შალვა პაპუაშვილი უკანონო მიგრანტების დაკავების ფაქტებზე: კანონში ცვლილებებიც მივიღეთ, რომ პროცედურები იყოს რაც შეიძლება ეფექტიანი. კარგია, რომ შსს ამ მხრივ აქტიურად მუშაობს და ჩვენ მიერ გადახალისებულ კანონმდებლობას იყენებს

ჩვენ კანონში ცვლილებებიც მივიღეთ, რომ პროცედურები იყოს რაც შეიძლება ეფექტიანი. კარგია, რომ შინაგან საქმეთა სამინისტრო ამ მხრივ აქტიურად მუშაობს და ჩვენ მიერ გადახალისებულ კანონმდებლობას აქტიურად იყენებს, - განუცხადა ჟურნალისტებს საქართველოს პარლამენტის თავმჯდომარემ, შალვა პაპუაშვილმა სახელმწიფოს მხრიდან უკანონო მიგრაციის წინააღმდეგ ბრძოლის კუთხით გადადგმულ ნაბიჯებზე საუბრისას.

იგი სამართალდამცველების მიერ უკანონო მიგრანტების დაკავების ფაქტებს გამოეხმაურა.

„ეს მნიშვნელოვანია არა მხოლოდ სახელმწიფოს შიდა უსაფრთხოებისთვის, მათ შორის, მნიშვნელოვანია საქართველოს შიდა შრომითი ბაზრისთვის, როდესაც არალეგალური დასაქმება ხდება, როდესაც კრიმინალურ მდგომარეობაზე შეიძლება, გავლენა ჰქონდეს და ეს არის მათ შორის, ნაწილი ევროკავშირთან უვიზო მიმოსვლისთვის ჩვენი მხრიდან აღებული პასუხისმგებლობისა, რომ საქართველომ თავადაც იზრუნოს, რომ არ იყოს არალეგალური მიგრაცია, რომელიც შეიძლება, შემდეგ როგორღაც გადაედინოს ევროკავშირში. თუმცა, იმის გათვალისწინებით, რომ ჩვენ ევროკავშირთან სახმელეთო საზღვარი არ გვაქვს, ზოგადად, ეს რისკები დაბალია.

ასე, რომ მისასალმებელი და მნიშვნელოვანია. ჩვენ კანონში ცვლილებებიც მივიღეთ, რომ ეს პროცედურები იყოს რაც შეიძლება ეფექტიანი. კარგია, რომ შინაგან საქმეთა სამინისტრო ამ მხრივ აქტიურად მუშაობს და ჩვენ მიერ გადახალისებულ კანონმდებლობას აქტიურად იყენებს“, - აღნიშნა პაპუაშვილმა.