თორნიკე ჭეიშვილი: საფრანგეთის ეროვნულ ასამბლეაში უმჯობესი იქნება დაფიქრდნენ და შეშფოთება გამოთქვან, რომ მაკრონის რეიტინგი ახლა ისტორიულ მინიმუმზეა

საფრანგეთის პარლამენტის ქვედა პალატაში, საგარეო ურთიერთობათა კომიტეტში დაიწყეს რეზოლუციაზე მსჯელობა იმის თაობაზე, რომ საქართველოში ვითომდა დემოკრატიის კუთხით უკუსვლას აქვს ადგილი, - განაცხადა გადაცემაში „დღის ქრონიკა“ იურიდიულ საკითხთა საპარლამენტო კომიტეტის თავმჯდომარის პირველმა მოადგილემ, თორნიკე ჭეიშვილმა.

მისივე თქმით, საფრანგეთის ეროვნულ ასამბლეაში უმჯობესი იქნება დაფიქრდნენ და შეშფოთება გამოთქვან, რომ მაკრონის რეიტინგი ახლა ისტორიულ მინიმუმზეა.

„როგორც ადრე, ამ შემთხვევაშიც მათ სურთ, რომ როგორმე შეცვალონ ხალხის მიერ არჩეული ხელისუფლება მოიყვანონ საკუთარი მარიონეტები, რომლებიც იქნებიან პირდაპირ დავალებების შემსრულებლები და ის პროცესები, რომელიც ახლა მიმდინარეობს საერთაშორისო აქტორებს შორის, როგორც ჩანს გარკვეულ ძალებს, მათ შორის იმ ძალებს, რომლებიც არ არიან დაინტერესებული ომის დასრულებით, ძალიან აღიზიანებთ და გააფთრებით ცდილობენ ნებისმიერი საშუალება გამოიყენონ იმისთვის, რომ ახალი ბერკეტები იპოვონ ამ ომის მსვლელობაზე ნეგატიური ზეგავლენის მოსახდენად.

ერთ-ერთი შესაძლებლობის გამოყენება მათი მხრიდან უკავშირდება საქართველოს, როგორც პლაცდარმად ქცევას, ქართველი ხალხის როგორც საზარბაზნე ხორცად გამოყენებას. კონკრეტული გლობალური ჩრდილოვანი ძალები ახლა ყველაფერს აკეთებენ იმისთვის, რომ მაქსიმალურად დაიტოვონ ეს ზეგავლენის ბერკეტები“, - აღნიშნა თორნიკე ჭეიშვილმა.