„თქვენ ხართ აღვირახსნილები“ - თეა წულუკიანის ამ განცხადებას მედია კოალიცია ეხმიანება (ვიდეო)

კოალიცია „მედიის ადვოკატირებისთვის“ ბრიფინგებზე ჟურნალისტების დისკრიმინაციის ფაქტების შესასწავლად სახალხო დამცველს მიმართავს.

კოალიცია განცხადებას ავრცელებს და წერს, რომ ეს არ არის პირველი შემთხვევა, როცა კულტურის სამინისტრო მედიასაშუალებების მიმართ შერჩევით დამოკიდებულებას ავლენს. 2021 წლის 22 ნოემბერს საქართველოს კულტურის მინისტრის მიერ დაგეგმილ ბრიფინგზე, ასევე არ მიიწვიეს მედიის ნაწილი. 2021 წლის 11 ნოემბერს იდენტური ფორმით შეიზღუდა ჟურნალისტთა უფლებები იუსტიციის სამინისტროს მიერ.

მსგავსი დისკრიმინაციული მიდგომა ლახავს მედიის წარმომადგენლების უფლებას შეასრულონ პროფესიული მოვალეობა, მიიღონ და გაავრცელონ ინფორმაცია მნიშვნელოვან საკითხებზე.

ამასთან, საზოგადოებას ეზღუდება შესაძლებლობა სხვადასხვა წყაროებზე დაყრდნობით თვალი ადევნოს მიმდინარე პროცესებს. საქართველოში აკრძალულია ნებისმიერი სახის დისკრიმინაცია.

აღნიშნული შემთხვევები კი ეწინააღმდეგება “დისკრიმინაციის ყველა ფორმის აღმოფხვრის შესახებ” საქართველოს კანონით დადგენილ წესებს.

კოალიცია კიდევ ერთხელ მოუწოდებს, კულტურის სამინისტროს შეწყვიტოს მედიის მიმართ დისკრიმინაციული მიდგომა და ყველა ჟურნალისტს მიეცეს ინფორმაციაზე წვდომის თანაბარი შესაძლებლობა.

ამასთანავე, კოალიცია მიმართავს საქართველოს სახალხო დამცველს, როგორც დისკრიმინაციის აღმოფხვრისა და თანასწორობის უზრუნველყოფაზე ზედამხედველ პირს, რათა საქართველოს კანონმდებლობით მინიჭებული უფლებამოსილებების ფარგლებში:

შეისწავლოს ბრიფინგებზე ჟურნალისტების დისკრიმინაციის ფაქტები და გამოსცეს შესაბამისი რეკომენდაცია;
მოამზადოს და შესაბამის დაწესებულებებს / პირებს გაუგზავნოს ზოგადი წინადადებები დისკრიმინაციის თავიდან აცილების და მის წინააღმდეგ ბრძოლის საკითხებზე.“, - ნათქვამია განცხადებაში.

„თქვენ ხართ აღვირახსნილები“ - ასე კულტურის მინისტრმა თეა წულუკიანმა ტელეკომპანია „ტვ პირველის“ ჟურნალისტს მიმართა, რომელიც ცდილობდა მინისტრისგან მოესმინა პასუხი, რატომ არ მიეცა ტელევიზიის გადამღებ ჯგუფს 8 დეკემბერს მინისტრის ბრიფინგზე შესვლის საშუალება.

ასევე საინტერესოა:

🔵 ქალბატონ ემას შეუძლია, ნებისმიერ დროს წაიღოს ეს მიკროფონი ჩემგან - თეა წულუკიანი

🔵 "არ მაინტერესებს არასამთავრობო ორგანიზაციების განცხადებები" - თეა წულუკიანი