წულუკიანი ვახტანგ მეგრელიშვილს: დისკუსიის სიმწვავის ხარისხი, რომელიც თქვენ არ გაკმაყოფილებთ პარლამენტში არის მხოლოდ და მხოლოდ იმ დესტრუქციული პარტიების ბრალი, რომლებმაც საკუთარ მანდატსა და ამომრჩეველზე უარი თქვეს

ვერ დაგეთანხმებით, რომ საქართველოს პარლამენტი ერთპარტიულია. ერთადერთი, რადიკალური ოპოზიციის ფრთა, რომელიც პარლამენტში შემოვიდა, სახეზეა. ალბათ თქვენ პლენარულ სხდომებს არ უსმენთ, ეს არის გიორგი გახარიას პარტია, - ასე მიმართა პარლამენტის თავმჯდომარის მოადგილემ, თეა წულუკიანმა პარტია „გირჩის“ ერთ-ერთ ლიდერს, ვახტანგ მეგრელიშვილს, რომელმაც საქართველოს პარლამენტს ერთპარტიული უწოდა.

როგორც თეა წულუკიანმა გადაცემაში „ღია ეთერი -დებატები“ აღნიშნა, გიორგი გახარიას პარტია არის რადიკალური, დესტრუქციული ძალა.

„მე მათ „ნაციონალური მოძრაობის“ საპარლამენტო ფრთა დავარქვი. ეს პარტია არსებობს ფრაქციის სახით და მწვავე რიტორიკაც აქვთ (ჩემთვის უშნაარსო). ასევე პარლამენტში არის „ხალხის ძალა“ და „ევროპელი სოციალისტები“. ამიტომ, ვერც შინაარსობრივად და ვერც ფორმის მხრივ ვერ დავარქმევთ ამ პარლამენტს ერთპარტიულს.

ამ პარლამენტში უფრო კარგი და მწვავე დისკუსიების შექმნა შეიძლება, მაგრამ ამას მე და ლევან მახაშვილი ვერ შევქმნით, ეს უნდა შექმნას იმ ოპოზიციამ, რომელმაც არაერთმა პარტიამ, სრულიად უპასუხისმგებლოდ, გარედან დავალებით, არ ისურვეს პარლამენტში შემოსვლას.

ჩვენ მათ რამეს კი არ ვაკრიტიკებთ, ვამბობთ ფაქტს, რომ კრიტიკა იმასთან დაკავშირებით, „ქართული ოცნების“ მიმართ ვერ იქნება, რადგან ერთპარტიულ პარლამენტს ჩვენ კი არ ვქმნით, დისკუსიის სიმწვავის ხარისხი, რომელიც თქვენ არ გაკმაყოფილებთ პარლამენტში არის მხოლოდ და მხოლოდ იმ დესტრუქციული პარტიების ბრალი, რომელბმაც საკუთარ მანდატსა და ამომრჩეველზე უარი თქვეს“, - აღნიშნა თეა წულუკიანმა.