ევროპაში 2026 წელს ხანძრისგან მიყენებულმა ზარალმა 3 მლრდ ევროზე მეტი შეადგინა

ევროკავშირის 5 ქვეყანაში, საფრანგეთში, ესპანეთში, პორტუგალიაში, საბერძნეთსა და რუმინეთში, 2026 წელს ხანძრისგან მიყენებულმა ზარალმა 3,1 მლრდ ევრო შეადგინა. ამის შესახებ Deutche Welle იუწყება.

გამოცემა Financial Times-ის მიერ გაკეთებული ეს შეფასება ევროკომისიის მიერ დათვლილი ზარალის ოდენობას მნიშვნელოვნად აღემატება. ევროპული კომისიის შეფასებით, მთელი ევროკავშირისთვის ხანძრისგან და ანომალიური სიცხისგან მიყენებულმა ზარალმა 2,5 მლრდ ევრო შეადგინა.

Financial Times წერს, რომ ზარალის დათვლისას ის სწორედ ევროკომისიას მეთოდოლოგიას იყენებს. ითვლება დამწვარი ტერიტორიის ნორმალურ მდგომარეობაში მოყვანის ხარჯები, რაც მათ ეკონომიკურ ფასს ნიშნავს. ხეების დარგვის და მათი მოვლის ხარჯები იმ ქვეყნების მიხედვით არის დათვლილი, სადაც ეს აუცილებელი იქნება. გამოთვლილია ხეებისა და მცენარეების ტიპი და ტყის ასაკი.

ზაფხულის ხანძრების პირველი ორი თვის განმავლობაში ტყე თითქმის ნახევარი მილიონი ჰექტარის ტერიტორიაზე დაიწვა.

საბოლოო ჯამში ზარალი მეტი იქნება, ვინაიდან სადაზღვევო კომპანიები, საწარმოები და ოჯახები ქონების განადგურებისა და მოსავლის განადგურებით მიყენებულ ზარალს ჯერ კიდევ ითვლიან. ასევე ზარალი ზაფხულის სეზონზე ტურისტულმა სექტორმაც განიცადა.

ასევე გამოცემა იმ ეკონომიკურ ზარალზეც წერს, რაც ევროპაში გვალვამ და მდინარეებში, რაინსა და დუნაიში წყლის დაბალმა დონემ გამოიწვია. ამან ტვირთების გადაზიდვის ლოგისტიკა დააზარალა და საბოლოოდ წარმოების გარკვეული კლება გამოიწვია.

ევროპულ ქვეყნებში ექსტრემალური სიცხე მაისიდან ფიქსირდება. რამდენიმე ქვეყანაში ამან ტყის ხანძრები გამოიწვია. საფრანგეთსა და ესპანეთში ხანძარი კონტროლიდან გავიდა, რის გამოც ასიათასობით ადამიანი იყო ევაკუირებული.