ლავროვმა რუბიოს კიევში სამიზნეებზე მოსალოდნელი დარტყმების შესახებ აცნობა

რუსეთის საგარეო საქმეთა მინისტრმა სერგეი ლავროვმა 25 მაისს აშშ-ის სახელმწიფო მდივანს მარკო რუბიოს ტელეფონით აცნობა რუსეთის გეგმების შესახებ, რომლებიც უკრაინის თავდასხმების საპასუხოდ კიევში სამხედრო ობიექტებსა და გადაწყვეტილების მიმღებ ცენტრებზე დარტყმას ითვალისწინებს. ინფორმაციას რუსული მედია რუსეთის საგარეო საქმეთა სამინისტროს განცხადებაზე დაყრდნობით ავრცელებს.

„რუსეთის პრეზიდენტ ვ.ვ. პუტინის დავალებით ს.ვ. ლავროვმა ოფიციალურად აცნობა ამერიკულ მხარეს, რომ კიევის რეჟიმის მიერ რუსეთის ტერიტორიაზე მშვიდობიანი მოსახლეობისა და სამოქალაქო ობიექტების წინააღმდეგ მიმდინარე ტერორისტული თავდასხმების საპასუხოდ, რუსეთის შეიარაღებული ძალები იწყებენ სისტემატურ და თანმიმდევრულ დარტყმებს კიევში განლაგებულ ობიექტებზე, რომლებიც გამოიყენება უკრაინის შეიარაღებული ძალების საჭიროებებისთვის, ასევე, იმ ცენტრებზე, სადაც ხდება შესაბამისი გადაწყვეტილებების მიღება“, - ნათქვამია განცხადებაში.

ამასთან, აღნიშნულია, რომ ლავროვმა საუბრისას ყურადღება რუსეთის საგარეო საქმეთა სამინისტროს 25 მაისის განცხადებაზე გაამახვილა, რომელშიც უწყება შეერთებულ შტატებს, კიევში მისიების მქონე სხვა ქვეყნებთან ერთად, უკრაინის დედაქალაქიდან დიპლომატიური პერსონალისა და სხვა მოქალაქეების ევაკუაციისკენ მოუწოდებს.

მინისტრმა გაიხსენა 2025 წლის აგვისტოში ანკორიჯში აშშ-ის წინადადებით უმაღლეს დონეზე მიღწეული შეთანხმებები უკრაინის კონფლიქტთან დაკავშირებით და სინანული გამოთქვა, რომ „ევროპული ელიტებისა და კიევის რეჟიმის თავხედური ძალისხმევა ძირს უთხრის ამ შეთანხმებებს, რომლებმაც გზა გაუხსნა ინტერესთა ბალანსზე დაფუძნებულ მდგრად, გრძელვადიან დარეგულირებას“.

მინისტრებმა ასევე გაცვალეს შეფასებები ჰორმუზის სრუტეში კრიზისის დასაძლევად დიპლომატიური ინიციატივებისა და კუბის გარშემო არსებული ვითარების შესახებ. მხარეებმა დაადასტურეს ორმხრივი ვალდებულება, ცნობილი უთანხმოების მიუხედავად, გააძლიერონ ძალისხმევა ერთმანეთის ტერიტორიაზე რუსეთისა და აშშ-ის დიპლომატიური მისიების სამუშაო პირობების ნორმალიზებისთვის.