მინეაპოლისში საპროტესტო აქციებზე ათობით ადამიანი დააკავეს, დაშავდა ერთი პოლიციელი

 „მინეაპოლისში, აშშ-ის საიმიგრაციო და საბაჟო სამსახურის (ICE) აგენტის მიერ მოკლული ქალის გამო გამართული საპროტესტო აქციების დროს, სულ მცირე 29 ადამიანი დააკავეს.

მინეაპოლისის პოლიციამ პარასკევს ღამით გამართული შეკრება უკანონოდ გამოაცხადა, მას შემდეგ რაც მომიტინგეებმა ქალაქში მდებარე სასტუმრო Canopy-სთან მოიყარეს თავი, სადაც, სავარაუდოდ ICE-ს რამდენიმე აგენტი იმყოფებოდა. სამართალდამცველების ცნობით, „ზოგიერთი პირი სასტუმროში უკანა შესასვლელიდან ძალის გამოყენებით შეიჭრა“.

ამასთან, დემონსტრაციის დროს, რომელშიც 1000-მდე ადამიანი მონაწილეობდა, ერთი პოლიციელიც დაშავდა - მას ყინულის ნატეხი ესროლეს. ოფიცერს სერიოზული სამედიცინო დახმარება არ დასჭირდა. ქალაქის პოლიციის უფროსის, ბრაიან ოჰარას განცხადებით, ყველა დაკავებული მოგვიანებით გაათავისუფლეს.

საპროტესტო აქციები საიმიგრაციო სამსახურის ქმედებების წინააღმდეგ აშშ-ის მასშტაბით მას შემდეგ დაიწყო, რაც 37 წლის რენი ნიკოლ გუდი ოთხშაბათს, საკუთარ ავტომობილში ჩაცხრილეს.

ტრამპის ადმინისტრაციის განცხადებით, აგენტი, რომელმაც ცეცხლი გახსნა, თავდაცვის მიზნით იმოქმედა. ადგილობრივი ოფიციალური პირები კი ამტკიცებენ, რომ ქალი არავითარ საფრთხეს არ წარმოადგენდა.