NATO-ში შვედეთისა და ფინეთის გაწევრიანების პროტოკოლურ ოქმებს ხელი მოეწერა

ბრიუსელში გამართულ დღევანდელ შეხვედრაზე ხელი მოეწერა NATO-ში შვედეთისა და ფინეთის გაწევრიანების პროტოკოლურ ოქმებს.

დოკუმენტს ხელი მოაწერა სამხედრო ალიანსის ოცდაათივე წევრი სახელმწიფოს ოფიციალურმა წარმომადგენლობამ.

ოქმის დადასტურება პროცედურული მოთხოვნაა, რომელიც წინ უძღვის საბოლოო რატიფიცირების პროცედურას, რისთვისაც აუცილებელია, რომ წევრობის კანდიდატურა 30-ვე სახელმწიფოს პარლამენტმა დაამტკიცოს.

დღევანდელ სხდომაზე რუსეთი პირდაპირ არ უხსენებიათ, მაგრამ სწორედ უკრაინაში რუსეთის შეჭრა გახდა იმის მთავარი არგუმენტი, რომ ორმა ტრადიციულად ნეიტრალურმა ქვეყანამ ნატოს წევრობა გადაწყვიტა.

NATO-ს გენერალურმა მდივანმა და შვედეთისა და ფინეთის საგარეო საქმეთა მინისტრებმა ერთობლივ კონფერენციაზე დღევანდელ დღეს "ისტორიული" უწოდეს და ოქმების დამტკიცება უაღრესად პოზიტიურ მოვლენად შეაფასეს.

რუსეთის ხელისუფლების წარმომადგენლებმა, რომლებიც კომენტარებს აკეთებდნენ ნატოში ორი ქვეყნის გაწევრიანებაზე, აცხადებდნენ, რომ, ერთი მხრივ, გმობენ ამას, მეორე მხრივ კი - ამაში ვერ ხედავენ განსაკუთრებულ პრობლემას, ვინაიდან რუსეთს არა აქვს ამ ქვეყნებთან ტერიტორიული დავა.

ასევე დაგაინტერესებთ:

* სეზონურ სამუშაოზე დასაქმებულმა ქართველებმა გერმანელ დამსაქმებელს სასამართლო დავა მოუგეს

* "საქართველოში მედიის წარმომადგენლების უსაფრთხოების მხრივ საგანგაშო ვითარებაა" - ქარტია 5 ივლისის მოვლენებზე