ბოჭორიშვილი ევროკომისიის ეკონომიკურ პროგნოზზე: ციფრები ყოველთვის მიუთითებს იმაზე, რომ ძალიან რთულია მოატყუო საზოგადოება და დამალო სიმართლე

„ეს ძალიან მნიშვნელოვანია სწორედ გაფართოების კონტექსტშიც - ეკონომიკური გაძლიერების და ეკონომიკური განვითარების გარეშე წარმოუდგენელი იქნება რომელიმე ქვეყნისთვის ევროკავშირში გაწევრიანებაზე საუბარი“, - ამის შესახებ საქართველოს საგარეო საქმეთა მინისტრმა მაკა ბოჭორიშვილმა ევროკომისიის პროგნოზთან დაკავშირებით განაცხადა, რომელმაც საქართველოს 7,3%-იანი ეკონომიკური ზრდა უწინასწარმეტყველა.

„ციფრები ყოველთვის მიუთითებს იმაზე, რომ ძალიან რთულია მოატყუო საზოგადოება და დამალო სიმართლე. სულ ცოტა ხნის წინ, ევროკომისიამ გამოაქვეყნა გაფართოების ანგარიში, სადაც უარი თქვა საქართველოს ეკონომიკური მიმართულებების შეფასებაზე.

სინამდვილეში, ეს ანგარიში არ ასახავს იმ რეალურ სურათს, როდესაც ჩვენ ვსაუბრობთ ქვეყნის ეკონომიკურ პროფილზე, სულ რამდენიმე დღის შემდგომ აქვეყნებს პროგნოზებს, თუ როგორი არის კანდიდატი ქვეყნების ეკონომიკური განვითარების პროგნოზი, სადაც სულ სხვა სურათი იხატება და ძალიან კარგად ჩანს, თუ რა პერსპექტივა აქვს საქართველოს.

ეს ძალიან მნიშვნელოვანია სწორედ გაფართოების კონტექსტშიც, - ეკონომიკური გაძლიერების და ეკონომიკური განვითარების გარეშე წარმოუდგენელი იქნება რომელიმე ქვეყნისთვის ევროკავშირში გაწევრიანებაზე საუბარი, იმიტომ რომ სწორედ ეს სჭირდება ქვეყანას იმისთვის, რომ იყოს კონკურენტუნარიანი“, - აღნიშნავს ბოჭორიშვილი.