დაღუპული 19 წლის მშობიარეს ოჯახი ექიმების დასჯას ითხოვს

19 წლის სესილი ბუბუტეიშვილის ოჯახი იმ კლინიკის ექიმების უმკაცრესად დასჯას ითხოვს სადაც ახალგაზრდა ქალი გარდაიცვალა.  

მშობიარე კლინიკაში 15 დეკემბერს ზუგდიდიდან შეიყვანეს. 

მედიკოსებმა საკეისრო კვეთისთვის მოამზადეს, თუმცა საოპერაციოში შესული ქალი კომაში ჩავარდა და რამდენიმე დღეში გარდაიცვალა.

ინფორმაციას „ტვ პირველი“ ავრცელებს.

მათივე ცნობით, ოჯახი დარწმუნებულია, რომ მშობიარეს გარდაცვალება ანესთეზიის ზედოზირებას ან ვადაგასული მედიკამენტის გამოყენებას მოჰყვა.

„სესილის ჯანმრთელობის პრობლემა არ ჰქონია, იყო სრულიად ჯანმრთელი. ქუთაისში იმიტომ წავიყვანეთ, რომ ექოსკოპიური დასკვნიდან გამომდინარე ბავშვი იყო გარდი-გარდმო.

ოპერაციის პროცესში გაჩერდა გული, რამაც გამოიწვია შემდეგ ტვინის შეშუპება, რამაც შემდეგ გამოიწვია უკვე ფატალური შედეგი.

ზუსტად არ იციან და არც მე ვიცი რა მოხდა იმ დროს. მაგრამ მე გავდივარ კონსულტაციებს კომპეტენტურ ადამიანებთან და მაინც ყველა გზა, როგორც მეუბნებიან, მიდის ანესთეზიისკენ. ან არის გადაჭარბებული დოზა ან კიდევ უხარისხო მედიკამენტი, - ამბობს გარდაცვლილის დედა „ტვ პირველთან“. 

საკითხს ამ დროისათვის ჯანდაცვის სამინისტროს რეგულირების სააგენტო სწავლობს. იმ შემთხვევაში თუკი მომხდარში სისხლის სამართლებრივი დანაშაული გამოიკვეთება, საქმეში საგამოძიებო უწყებები ჩაერთვებიან. 

დღის სხვა ამბები:

🔵 "დედაჩემი ორი დღეა დაკარგულია, ეძებს პოლიციაც... სანამ დაიკარგებოდა თავს კარგად ვერ გრძნობდა" - ოჯახი ნათელა ღლონტს ეძებს

🔵 მაია ბუწაშვილი: ეს წელი კოვიდის გამო ძალიან ბევრისთვის იყო ცრემლიანი, ახლობელი ადამიანის დაკარგვის გამო - ხშირად ცრემლიანი იყო ექიმებისთვისაც

🔵 თოვა, ქარბუქი, შეზღუდული ხილვადობა - ვითარება საქართველოს გზებზე