დავით მათიკაშვილი: ვერანაირი თანამდებობა, ვერ იქნება ვერავისთვის ინდულგენცია და თუკი ვინმეს ხელი წაუცდა კორუფციისკენ, სახელმწიფო იქნება მკაცრი და კანონის ფარგლებში ყველას პასუხს მოსთხოვს

„ცოტა ხნის წინ შევიტყვეთ, რომ კონკრეტულ პირებთან საგამოძიებო მოქმედებები დაიწყო ძალოვანი სტრუქტურების მიერ და დღეს გვაცნობეს, რომ ერთ-ერთი ასეთი საგამოძიებო მოქმედების ჭრილში კონკრეტული თანხა ამოიღეს“, - ამის შესახებ მმართველი გუნდის დეპუტატმა დავით მათიკაშვილმა განაცხადა, რითაც გამოეხმაურა პროკურატურის მიერ გავრცელებულ ინფორმაციას.

როგორც დეპუტატი აღნიშნავს, ვერანაირი თანამდებობა, ვერ იქნება ვერავისთვის ინდულგენცია.

„ძალიან სამწუხაროა, როდესაც ყოფილი თანაგუნდელების მიმართ მსგავსი ტიპის სისხლის სამართლის საქმესთან დაკავშირებული პროცედურების წარმოება ხდება. სათქმელი არის ერთი - არანაირი თანამდებობა, არანაირი სტატუსი მოქმედ თუ წარსულში არსებულ პოლიტიკურ მდგენელში ვერ იქნება ვერავისთვის ინდულგენცია და თუკი ვინმეს ხელი წაუცდა კორუფციისკენ, ბუნებრივია, სახელმწიფო იქნება მკაცრი და კანონის ფარგლებში ყველას პასუხს მოსთხოვს“, - აღნიშნა მათიკაშვილმა.

მისი თქმით, სახელმწიფოს კორუფციასთან ბრძოლის ამბიციური გეგმა აქვს.

„ჩვენი ქვეყანა არის დემოკრატიული სახელმწიფო და აქ მოქმედებს გამჭვირვალე და დემოკრატიულ პრინციპებზე აგებული სისხლის სამართლის კანონმდებლობა. ყველა საქმე, რომელიც წარმოებს სისხლის სამართლის ჭრილში, ბუნებრივია, რომ ის მაღალი მტკიცებულებით დატვირთვით არის გაჯერებული, ეს იმას ნიშნავს, რომ ყველა ბრალდებას სჭირდება შესაბამისი მყარი მტკიცებულება“, - დასძინა მათიკაშვილმა.