კახა კალაძე: რასაკვირველია არჩევნების შედეგს ვაღიარებთ - ჩვენი მოსახლეობის არჩევანი არის უზენაესი

პარტია „ქართული ოცნება - დემოკრატიული საქართველოს“ თბილისის მერობის კანდიდატის კახა კალაძის განცხადებით, ის 2025 წლის თვითმმართველობის არჩევნების შედეგს, რასაკვირველია, აღიარებს, ვინაიდან მოსახლეობის არჩევანი უზენაესია.

ამის შესახებ მან საზოგადოებრივი მაუწყებლის ეთერში თბილისის მერობის კანდიდატებს შორის გამართული დებატებისას შესაბამისი კითხვის პასუხად განაცხადა.

„რასაკვირველია, არჩევნების შედეგს ვაღიარებთ. ამ ქალაქის და ქვეყნის ბატონ-პატრონი არის მისი აღმატებულება ქართველი ხალხი და ჩვენი მოსახლეობის არჩევანი არის უზენაესი. ვინც ვერ ხედავს და არ ითვალისწინებს ქართველი ხალხის ნებას, ვხედავთ ის პოლიტიკური დაჯგუფებები თუ პარტიები დღეს სად იმყოფებიან“, - განაცხადა კახა კალაძემ.

ამასთან, მისივე თქმით, მმართველი გუნდის ოპონენტებს მოახლოებულ თვითმმართველობის არჩევნებში წარმატების შანსი არ აქვთ, რადგან ქართულ პოლიტიკაში რადიკალიზმის დრო აღარ არის.

„რაც შეეხება ოპონენტებს, მოდით, შევხედოთ რეალობას, არ მინდა, ამპარტავნულად გამომივიდეს, მაგრამ ყველამ ვიცით, რომ ამ პოლიტიკურ ძალებს ამ არჩევნებში წარმატების ანარაირი შანსი არ გააჩნიათ. ხედავთ ოპოზიციურ ძალებს, რომლებიც ორად არიან გაყოფილი: ერთი დაჯგუფება დამხობით ემუქრება საქართველოს ხელისუფლებას და არეულობის შემოტანას აანონსებს ქვეყანაში; მეორე ძალა, რომელიც არჩევნებში მონაწილეობს, ამბობს, რომ თუ ისინი გამარჯვებას მიაღწევენ, ყველაფერს გააჩერებენ - მუნიციპალური ტრანსპორტს, მერიის შესაბამის სამსახურებს. მინდა, ერთი რამე ვთქვა: ქართულ პოლიტიკაში რადიკალიზმის დრო ჩაბარებულია წარსულს.

არავის მიეცემა შესაძლებლობა, რომელი პოლიტიკური პარტიის წარმომადგენელიც არ უნდა იყოს, რადიკალიზმით და ბოროტებით ვერანაირ წარმატებას და გამარჯვებას ვერ მიაღწევს. მაშინ, როდესაც ხარ აგენტურული ქსელის წარმომადგენელი, ფინანსდები გარედან, იღებ გარე მითითებებს თუნდაც ქვეყნის წინააღმდეგ, იღებ თანხებს იმაში, რომ წაახალისო ექსტრემისტული ორგანიზაციები, წაახალისო საზოგადოების გახლეჩა, დაპირისპირება, გააღრმაო პოლარიზაცია, რა თქმა უნდა, არანაირი მომავალი არ გაქვს არც პოლიტიკური და არც სხვა მიმართულებით“, - განაცხადა კახა კალაძემ.