კოვიდის სამკურნალო წამალმა პაქსლოვიდმა ავტორიზაცია მოიპოვა

,,ფაიზერის" წარმოების პირველმა მედიკამენტმა პაქსლოვიდმა FDA-ს ავტორიზაცია მოიპოვა. ამერიკის შეერთებული შტატების საკვების და წამლის ადმინისტრაციამ( FDA) პაქსლოვიდის მედიკამენტის გადაუდებელი გამოყენების ნებართვა დაუშვა.

კლინიკურმა კვლევებმა აჩვენა რომ მედიკამენტს 89%-ით შეუძლია შეამციროს მოზრდილებში კორონავირუსით ჰოსპიტალიზაციის ან სიკვდილის რისკი თუ პაციენტები პირველი სიმპტომების გამოვლენიდან 3 დღეში პრეპარატს მიიღებენ.

,,ფაიზერის" აღმასრულებელი დირექტორის ალბერტ ბურლას განცხადებით, კოვიდის სამკურნალო პირველ მედიკამენტს პაციენტების სიცოცხლის გადარჩენა შეუძლია და 10-დან 1-მდე ამცირებს ინფიცირების სიმძიმეს. პაქსლოვიდის გამოყენება ექიმის რეცეპტით იქნება შესაძლებელი. ,,ფაიზერის" მიერ დამზადებული მედიკამენტი პაქსლოვიდი ანტივირუსულ ნაერთებს (ნირმატრელვირს, რიტონავირს) შეიცავს.

,,კორონავირუსის საწინააღმდეგო პირველი მედიკამენტის ავტორიზაცია არის მთავარი ნაბიჯი გლობალური პანდემიის წინააღმდეგ ბრძოლაში, მაშინ როდესაც სახეზე გვაქვს ვირუსის ახალი შტამები,“ – განაცხადა პატრიცია კავაცონიმ, რომელიც საკვებისა და წამლის ადმინისტრაციაში წამლების შეფასებისა და კვლევის ცენტრს ხელმძღვანელობს.

პრეპარატის შემქმნელებისა და მკვლევარ-მეცნიერების განცხადებით, მედიკამენტი პაქსლოვიდი არ არის ვაქცინაციის პროცესის შემცველი და ვაქცინაცია კვლავ რჩება ყველაზე მნიშვნელოვან იარაღად კოვიდის წინააღმდეგ ბრძოლაში.

ნონა გედენიძე სპეციალურად ExclusiveTV.ge-სთვის ემილია-რომანიადან