ლევან მაჭავარიანი: ბოლო თვეების განმავლობაში ჩვენსა და ამერიკის შეერთებულ შტატებს შორის პოზიტიურ დინამიკას ვხედავთ - ბურთი მათ მოედანზეა

„ბოლო თვეების განმავლობაში ჩვენსა და ამერიკის შეერთებულ შტატებს შორის პოზიტიურ დინამიკას ვხედავთ“, - განაცხადა პარლამენტის ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა მედიასთან საუბრისას.

ის ასე გამოეხმაურა 22 სექტემბერს ნიუ-იორკში ამერიკის შეერთებული შტატების პრეზიდენტ დონალდ ტრამპის ოფიციალურ მიღებაზე საქართველოს პრემიერ-მინისტრ ირაკლი კობახიძის დასწრებას.

მაჭავარიანმა აღნიშნა, რომ ამერიკულმა მხარემ იცის საქართველოს მზადყოფნა ახალი პარტნიორობის დაწყებასთან დაკავშირებით.

„სახელმწიფო დეპარტამენტის დელეგაცია ჩამოსული იყო და ძალიან კარგი შეხვედრები შედგა. რაც მთავარია, ამერიკულმა მხარემ ახალი პარტნიორობის დაწყებასთან, რეალურ პარტნიორობასა და მეგობრობასთან დაკავშირებით ჩვენი მზადყოფნის შესახებ იცის. ბურთი მათ მოედანზეა. მათ იციან, რომ ჩვენ მზად ვართ, ნებისმიერ დროს დავსხდეთ და კონკრეტული გზამკვლევი გავწეროთ, დროსა და სივრცეში, სადაც ასახული იქნება, თუ რა ნაბიჯები უნდა გადადგას საქართველომ, რა ნაბიჯები უნდა გადადგას ამერიკის შეერთებულმა შტატებმა და ამ გზამკვლევში, რა თქმა უნდა, ორივე ქვეყნის ინტერესები უნდა იყოს ასახული“, - განაცხადა ლევან მაჭავარიანმა.