ლევან მაჭავარიანი: ჩვენ ჩვენი დღის წესრიგი გვაქვს და არ გვაინტერესებს საარჩევნო წელია თუ არა საარჩევნო წელი, ჩვენ რაც გვაქვს შესასრულებელი, ამ ყველაფერს ვასრულებთ, ვაძლიერებთ ჩვენს ქვეყანას

„ჩვენ ჩვენი დღის წესრიგი გვაქვს და არ გვაინტერესებს საარჩევნო წელია თუ არა საარჩევნო წელი. ჩვენ რაც გვაქვს შესასრულებელი, ამ ყველაფერს ვასრულებთ, ვაძლიერებთ ჩვენს ქვეყანას“, - განაცხადა გადაცემაში „იმედი LIVE“ საპარლამენტო ფრაქცია „ქართული ოცნების“ თავმჯდომარის პირველმა მოადგილე ლევან მაჭავარიანმა.

მაჭავარიანის თქმით, ხელისუფლების ამოცანაა, რომ 2029 წელს ნული იყოს სიღარიბის და უმუშევრობის მაჩვენებლები.

„საარჩევნო გეგმებთან დაკავშირებით, ჩვენ ჩვენი დღის წესრიგი გვაქვს და არ გვაინტერესებს საარჩევნო წელია თუ არა საარჩევნო წელი. ჩვენ რაც გვაქვს შესასრულებელი, ამ ყველაფერს ვასრულებთ. ვაძლიერებთ ჩვენს ქვეყანას. უფრო სუვერენული და დამოუკიდებელი ხდება საქართველო თითოეული ჩვენი ნაბიჯიდან გამომდინარე. ჩვენს ქვეყანაში დაცულია მშვიდობა და სტაბილურობა. რა თქმა უნდა, ქართველები კარგად იაზრებენ, რომ მხოლოდ „ქართული ოცნება“ ბიძინა ივანიშვილის ხელმძღვანელობით არის ამ ყველაფრის გარანტი და ჩვენი მთავარი ამოცანაა ეკონომიკა კიდევ უფრო გავაძლიეროთ. ის სიღარიბე, რაც არის დღეს დარჩენილი, დაახლოებით 300 ათასი ადამიანი, რომელიც 2012 წელს მილიონ 100 ათასზე მეტი იყო. კი, 300 ათასიც ბევრია ჩვენი ზომის ქვეყნისთვის, თუმცა უნდა გავითვალისწინოთ, რომ მილიონ 100 ათასიდან ჩამოვიდა 300 ათასამდე.

ჩვენი ამოცანაა, რომ 2029 წელს ნული იყოს სიღარიბის და უმუშევრობის მაჩვენებლები. თუ ეს მავნებლები[ოპოზიცია] ხელს იმით შეგვიწყობენ, რომ მინიმუმ ამდენ მავნებლობას არ ჩაიდენენ, სულ საბოტაჟირების, ჯანჯღარის რეჟიმში არ იქნებიან, დაასანქცირე ჩემი ქვეყანა, პეტიციები, ბიზნესი დაიხუროს, მოდი ახლა კურსი ავარდეს და ასეთ მოღალატეობრივ საქციელს თუ არ ჩაიდენენ, უფრო დაჩქარდება ჩვენი ეკონომიკური ზრდის ტემპი“, - აღნიშნა მან.