ლევან მაჭავარიანი უკრაინასთან ურთიერთობაზე: ჩვენ უნდა დავინახოთ, რომ ისინი კონკრეტულ ნაბიჯებს დგამენ იმასთან დაკავშირებით, რომ რაც დააშავეს, სურვილი აქვთ, ეს ყველაფერი გამოასწორონ

ჩვენ უნდა დავინახოთ, რომ ისინი კონკრეტულ ნაბიჯებს დგამენ იმასთან დაკავშირებით, რომ რაც დააშავეს, სურვილი აქვთ, ეს ყველაფერი გამოასწორონ, - განაცხადა ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა გადაცემა „დღის ქრონიკაში“.

წამყვანმა ჰკითხა, რაზე მიანიშნებს კომუნიკაციის გაცოცხლება კიევთან და შესაძლებელია თუ არა უახლოეს მომავალში ვიხილოთ დიპლომატიური წარმომადგენლობა როგორც კიევში, ასევე თბილისში კიევის მხრიდან.

„საქართველო ყველას სჭირდება და სჭირდებათ, როგორც პარტნიორი, ვინაიდან ყველამ იცის, როგორი სანდო პარტნიორია. კიდევ ერთხელ ხაზს გავუსვამ ჩვენს ადგილმდებარეობას, რომელიც გეოპოლიტიკურ ჭრილში უმნიშვნელოვანესია. კიევის ხელისუფლებამაც დაინახა ის, რასაც დღეს ევრობიუროკრატები არ იმჩნევენ, მაგრამ ხვალ შეიმჩნევენ.

დაინახეს, რომ საქართველოში ხელისუფლება ვერ ნაცვლდება - ვერც სააკაშვილი მოჰყავთ, ვერც რადიკალური ოპოზიცია და ვერც გვარამია. [კიევში] მიხვდნენ, რომ აზრი არ ჰქონდა დროის გაწელვას და დაიწყეს ჩვენთან საუბარი, ზუსტად ანალოგიურს ველოდებით ევრობიუროკრატებისგან.

იმდენი შეცდომა დაუშვა ოფიციალურმა კიევმა საქართველოსთან მიმართებით, პირდაპირ ომში გვითრევდნენ, ადეიშვილი და ლორთქიფანიძე დანიშნეს მაღალ თანამდებობაზე, სააკაშვილი შემოაპარეს - ამას ასე ადვილად ვერ დავივიწყებთ. დაჩქარდა მოვლენები, სურთ ჩვენთან კომუნიკაციის აღდგენა, მაგრამ ჩვენ უნდა დავინახოთ, რომ ისინი კონკრეტულ ნაბიჯებს დგამენ იმასთან დაკავშირებით, რომ რაც დააშავეს, სურვილი აქვთ, ეს ყველაფერი გამოასწორონ“, - აღნიშნა მაჭავარიანმა.