მაჭავარიანი: საქართველო არის საკვანძო ადგილზე შუა დერეფანში - ევრობიუროკრატებს მოუწევთ გეოგრაფიის აღიარება და იმის თქმა, რომ საქართველოზე გადის მარშრუტი, რომელიც მათთვის სასიცოცხლოდ მნიშვნელოვანია

ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა გადაცემა „დღის ქრონიკაში“ განაცხადა, რომ შუა დერეფანში საქართველო საკვანძო ადგილზეა.

მისივე თქმით, ევრობიუროკრატებს მოუწევთ იმის აღიარება, რომ მათთვის სასიცოცხლოდ მნიშვნელოვანი მარშრუტი საქართველოზე გადის.

„დღეს შუა დერეფანი არის უალტერნატივო, სადაც საქართველო აზერბაიჯანთან ერთად არის ხერხემალი. ჩრდილოეთ დერეფანი დაკეტილია, სამხრეთ დერეფანში პრობლემებია, ახლო აღმოსავლეთში განვითარებული მოვლენების გამო და ერთადერთი მარშრუტი, რითაც ჩინეთიდან, შუა აზიის ქვეყნებიდან ის პროდუქცია და საქონელი, რაც უნდა მიიღოს ევროკავშირმა, ყველაფერმა უნდა გაიაროს საქართველოზე.

ჩვენი ხელისუფლება ყველაფერს აკეთებს, რომ ტვირთის გამტარუნარიანობა იყოს მაქსიმალური და არანაირი დანაკარგი არ იყოს. ამას ემსახურება ავტოსაგზაო მაგისტრალების მშენებლობა, პორტების გაფართოება, ანაკლიის პორტის მშენებლობა, ახალი აეროპორტების მშენებლობა და არსებული აეროპორტების გაფართოება, რკინიგზის მოდერნიზაცია. აქედან გამომდინარე, როგორი გაბუტვის რეჟიმშიც არ უნდა იყვნენ დღეს ევრობიუროკრატები, ხვალ თუ ზეგ მათ მოუწევთ გეოგრაფიის აღიარება და მოუწევთ იმის თქმა, რომ საქართველოზე გადის ის მარშრუტი, რომელიც მათთვის სასიცოცხლოდ მნიშვნელოვანია და ამ შემთხვევაში, ჩვენს ხელისუფლებასთან საუბარიც მოუწევთ. აქამდე ისინი ყველაფერს აკეთებდნენ იმისთვის, რომ საქართველოში ვასალი ხელისუფლება ჰყოლოდათ და ჩვენ აგენტურით ჩავენაცვლებინეთ“, - აღნიშნა ლევან მაჭავარიანმა.