მაკა ბოჭორიშვილი: საქართველოსთვის ფორუმის თავმჯდომარეობა იქნება კიდევ ერთი შესაძლებლობა, ორგანიზაციის მუშაობაში წვლილი შეიტანოს

საქართველოს ვიცე-პრემიერმა, საგარეო საქმეთა მინისტრმა მაკა ბოჭორიშვილმა ეუთოს უსაფრთხოებისთვის თანამშრომლობის ფორუმის (FSC) გახსნით სხდომასთან დაკავშირებით მედიასთან კომენტარი გააკეთა.

მაკა ბოჭორიშვილის თქმით, ეუთოს უსაფრთხოების ფორუმი არის მნიშვნელოვანი ფორმატი - „სადაც ძირითადად ხდება ეუთო-ს ფარგლებში უსაფრთხოების და ეუთო-ს რეგიონში უსაფრთხოების კუთხით არსებული გამოწვევების შესახებ მსჯელობა. საქართველოსთვის, რა თქმა უნდა, ფორუმის თავმჯდომარეობა იქნება კიდევ ერთი შესაძლებლობა, ორგანიზაციის მუშაობაში შეიტანოს წვლილი.“

მინისტრმა ყურადღება გაამახვილა ორგანიზაციის მნიშვნელობაზე, განსაკუთრებით იმ ფონზე, როდესაც საქართველოს აქვს უსაფრთხოების ძალიან მნიშვნელოვანი გამოწვევები.

„ჩვენთვის ეს საერთაშორისო ორგანიზაცია არის მნიშვნელოვანი, გამომდინარე იქიდან რომ თავად საქართველოს აქვს უსაფრთხოების ძალიან მნიშვნელოვანი გამოწვევები ოკუპაციის თვალსაზრისით, და რა თქმა უნდა მნიშვნელოვანია, მუდმივად იყოს ჩვენთვის მნიშვნელოვან საკითხებზე აქცენტები გაკეთებული, როდესაც ჩვენ ვსაუბრობთ საერთაშორისო ნორმების შესრულებაზე, როდესაც ვსაუბრობთ იმაზე, რომ არ უნდა ხდებოდეს საერთაშორისო პრინციპების დარღვევა“, - განაცხადა უწყების ხელმძღვანელმა.

მაკა ბოჭორიშვილმა ჟურნალისტებთან საუბრისას აღნიშნა, რომ ფორუმის ფარგლებში ასევე განიხილება ორგანიზაციისთვის მნიშვნელოვანი სხვა საკითხებიც, მათ შორის უკრაინაში მიმდინარე ომი.

„რა თქმა უნდა, უკრაინის საკითხი და ომი უკრაინაში რჩება ჩვენი რეგიონისთვის ისევ და ისევ მნიშვნელოვან გამოწვევად, და ჩვენი დღის წესრიგიც მიმართული იქნება სწორედ ამ საკითხზე მსჯელობების ხელშესაწყობად“, - აღნიშნა საგარეო საქმეთა მინისტრმა.

საგარეო საქმეთა მინისტრმა ასევე აღნიშნა, რომ საქართველომ წარადგინა განაცხადი მომავალ წელს ეუთო-ს თავმჯდომარეობაზე.

„ეს არის ის გადაწყვეტილება, რომელიც უნდა მიიღონ მონაწილე ქვეყნებმა ერთსულოვნად, ყველა ქვეყანამ უნდა დაუჭიროს მხარი. ვნახოთ, როგორ წარიმართება მუშაობა ამ საკითხზე. ჯერ ადრეა საუბარი, რამდენად იქნება ჩვენი კანდიდატურა მხარდაჭერილი. თუმცა, მეორე მხრივ, ქვეყანა, რომელსაც აქვს ყველა მიმართულებით, რაზედაც ეუთო მუშაობს, საკუთარი სიტყვა სათქმელი - იქნება ეს უსაფრთხოების გამოწვევები, დაკავშირებადობა, ეკონომიკური განვითარება თუ ადამიანის უფლებები - მნიშვნელოვანი იქნება ეუთოს მომავალი მუშაობისთვის, თუკი მის კანდიდატურას მონაწილე ქვეყნები დაუჭერენ მხარს,“ - განაცხადა მაკა ბოჭორიშვილმა.