თეა წულუკიანი: მოიხურეს კრავის ტყავები და თავს გვაჩვენებენ, თითქოს უნდათ ჰარმონია და თანხმობა

კულტურის მინისტრი, თეა წულუკიანი ამბობს, რომ ექსპრეზიდენტ მიხეილ სააკაშვილის და სხვა ოპონენტების გულწრფელობის არ სჯერა.

მისი განცხადებით, "ნაციონალურ მოძრაობას" აქვს მორიგი მცდელობა, საზოგადოება შეცდომაში შეიყვანოს.

"როდესაც ისინი ხელისუფლებაში იყვნენ, ყოველთვის ხლეჩდნენ საზოგადოებას, ყოველთვის ყოფდნენ საზოგადოებას ჩარეცხილებად და თავისიანებად.

სამწუხაროდ, ჩვენ დღესაც ამის შედეგს ვიმკით.

დღეს მათ ჩაიცვეს, მოიხურეს კრავის ტყავები და თავს გვაჩვენებენ, თითქოს უნდათ ჰარმონია და თანხმობა, არადა არიან პირველი და, მე ვიტყოდი, ერთადერთი წყარო იმ საშინელი პოლარიზაციის, რომელიც დღეს ქვეყანაში არსებობს.

პირველ რიგში, საზოგადოებამ, თქვენ უნდა აპატიოთ, ნაციონალურ მოძრაობას იმისთვის, რომ დღეს კანონიერად და ლეგიტიმურად არჩეულმა ხელისუფლებამ საზოგადოების სახელით მათთან შერიგების პროცესი წამოიწყოს,"- განაცხადა წულუკიანმა.

საქართველოს ყოფილმა პრეზიდენტმა მიხეილ სააკაშვილმა ეროვნულ შერიგებასთან დაკავშირებით რამდენიმე დღის წინ ფეისბუკ გვერდზე წერილი გამოაქვეყნა.

"უახლოეს დღეებში ბრძოლა გამძაფრდება და არ გაჩერდება თქვენს დამარცხებამდე.

ან თუ გონს მოეგებით და წამოხვალთ ეროვნულ შერიგებაზე, ვიდრე გვიან არაა, ეს ყველასთვის საუკეთესო გამოსავალია", – აღნიშნულია წერილში.

ამავე თემაზე:

🔲 ირაკლი ზარქუა: ტყუილია, ვინმეს თუ ჰგონია, სააკაშვილი მოინანიებს და ციხიდან გამოვუშვებთ

🔲 "სანამ სალომე ზურაბიშვილს მორიგ შეწყალებას მოსთხოვთ, ჯერ ჩამოყალიბდით, პრეზიდენტად აღიარებთ, თუ არა?!" - ამირან სალუქვაძე