ვიოლა ფონ კრამონი: თეა წულუკიანი იყენებს იგივე მეთოდებს, რასაც პუტინი!

თეა წულუკიანის „იმედის“ ეთერში გაკეთებულ განცხადებას, უკვე გამოეხმაურა გერმანელი ევროპარლამენტარი ვიოლა ფონ კრამონი.  საქართველოს კულტურის მინისტრმა „იმედს“ უთხრა, რომ „ვიოლა ფონ კრამონს საქართველო და ქართველი ხალხი დიდად არ აღელვებს“.

ვიოლა ფონ კრამონი „TV პირველთან“საუბარში აღნიშნავს, რომ თეა წულუკიანი იყენებს იგივე მეთოდებს, რასაც პუტინი – „როცა პუტინს აკრიტიკებენ, მათ რუსოფობებს ეძახიან, არადა ეს კრიტიკა არ მიემართება რუს ხალხს, ჩვენ ვაკრიტიკებთ პუტინის რეჟიმს. ასეა საქართველოს შემთხვევაშიც, ჩვენ ვაკრიტიკებთ არა ქართველ ხალხს და საქართველოს, არამედ ხელისუფლებას, როგორც საქართველოს წარმომადგენელს, რადგან მოვლენები მათი მხრიდან არასწორად ვითარდება“.

„გულწრფელად რომ გითხრათ, ძალიან გაკვირვებული ვარ. 2012 წელს ძალიან საინტერესო შეხვედრა მქონდა ქალბატონ წულუკიანთან, მე მაშინ საქართველოში, მის ოფისში ვიყავი და ბევრი ვისაუბრეთ. ორივეს ძალიან გვიხაროდა, რომ „ნაციონალური მოძრაობისა“ და მიშას გადარჩევა მოხდა. კანონის უზენაესობაზე, ციხეებში პატიმრების საკითხებზე, დემოკრატიულ რეფორმებზე, ჩვენ აბსოლუტურად ერთ მხარეს ვიყავით. მე ვიცი, რომ ის ძალიან განათლებულია, წლების განმავლობაში მუშაობდა ევროპაში, ევროპული სასამართლოსთვის, ის იყო დემოკრატიის მხარდამჭერი, მაგრამ ახლა რაღაც მოხდა.

არანაირი იდეა არ მაქვს, რატომ გახდა ის ასეთ რადიკალური და რატომ ავრცელებს ასეთ ინფორმაციას. მე არ ვარ „ნაციონალური მოძრაობის“ ბანაკში და არც არასდროს ვყოფილვარ. მიკვირს, რატომ ამირჩია მე, რადგან აქ, ევროპარლამენტში 5 მსხვილი პარტია ვართ, ვინც ერთნაირად ფიქრობს მიმდინარე პროცესებზე საქართველოში. მისი ბრალდებები ჩემზე არის აბსოლუტურად უსაფუძვლო და იმედგამაცრუებელი“, – თქვა ვიოლა ფონ კრამონმა „TV პირველთან“ ინტერვიუში.
 
კულტურის მინისტრმა თეა წულუკიანმა „იმედი LIVE-ს“ ეთერში თქვა, რომ „ქალბატონი ფონ კრამონს, ნაციონალებთან მეგობრობს გამო, დარწმუნებული ვარ, საქართველო და ქართველი ხალხი დიდად არ აღელვებს. თავის მეგობრებს რომ გარედან მხარი დაუჭიროს, მზად არის, დამოუკიდებელი საქართველოს დეპუტატს, მთავრობას, მიაყენოს ღია შეურაცხყოფა. ეს არ არის ბრალდება, ეს ფაქტია“.

წულუკიანის მტკიცებით, „ნაციონალური მოძრაობა“ ცდილობს, „უცხოელთა პატარა ჯგუფი მოგვყიდოს, რომ ისინი არიან ევროპა და დასავლეთი“. მისივე თქმით, უცხოელთა ეს ჯგუფი ცდილობს, „ქართველ ხალხს მიჰყიდოს, რომ თუკი ისინი რაღაცით არიან უკმაყოფილოები, ეს ნიშნავს, რომ დასავლეთ ევროპა, ჩრდილო ატლანტიკური ალიანსი, ფრანგები, გერმანელები, პოლონელები და ყველა გვერჩის ერთიანად“.

კულტურის მინისტრმა „უცხოელთა ჯგუფში“ ევროპარლამენტარებს ვიოლა ფონ კრამონი, ანა ფოტიგა, აშშ-ის ყოფილი ელჩი საქართველოში იან კელი და ლიეტუვის სეიმის წევრ ჟიგიმანტას პავილიონისი დაასახელა.

ასევე საინტერესოა:

🔵 ლარი ისევ გამყარდა - ვალუტის კურსი

🔵 კანდელაკი: " ქართულმა ოცნებამ" მტკიცე პოზიცია გამოავლინა და რუსეთის წინააღმდეგ სანქციების დაწესებას ფეხში გასროლა უწოდა"

🔵 თბილისში 18-დან 26 მაისამდე ტრანსპორტის მოძრაობა შეიზღუდება