იტალია Green pass-ის მოწინააღმდეგეთა საპროტესტო აქციებს შეზღუდავს

„პროტესტისა და გამოხატვის თავისუფლების გარანტიას, ჩვენი სახელმწიფოს კონსტიტუცია იძლევა, მაგრამ არსებობს გარემოებები, როდესაც აუცილებელია საკითხის დარეგულირება. საჭიროა წესები, რომლებიც იმ მოქალაქეების უფლებებს დაიცავენ, რომლებიც საპროტესტო გამოსვლებში არ არიან ჩართულნი. ვაპირებ ბრძანებულების გამოცემას, რომელიც მანიფესტაციებს გარკვეულ ჩარჩოებში მოაქცევს“, განაცხადა იტალიის შს მინისტრმა ლუჩანა ლამორჯეზემ.

„უკვე მერამდენე შაბათია, როდესაც იტალიის მთელი რიგი ქალაქები მანიფესტანტების მიერ,  თითქმის მთელი დღის განმავლობაში „იბლოკება“. გამოსვლების მონაწილეთა ქმედებები, ხშირად არღვევენ დანარჩენი მოსახლეობის უფლებებს და ხელს უშლიან სამუშაო პროცესს, ეს მაშინ, როდესაც ქვეყანა ეკონომიკურად ფეხზე წამოდგომას ცდილობს. ვეცდებით დავარეგულიროთ აღნიშნული საკითხი იმგვარად, რომ არც მანიფესტანტების უფლებები დაირღვეს და არც დანარჩენი მოქალაქეების სამუშაო და განათლების უფლებები“, ხაზი გაუსვა ლამორჯეზემ.

შეზღუდვა ძირითადად ქალაქების ისტორიულ ცენტრებში საპროტესტო გამოსვლების გამართვას შეეხება. ასევე, მანიფესტანტები ვალდებულნი იქნებიან დაიცვან პანდემიასთან დაკავშირებით დაწესებული რეგულაციები, იქნება ეს ნიღბის ტარება, თუ სოციალური დისტანცია. რადგან, ფრიული-ვენეცია-ჯულიას რეგიონში, სადაც ყველაზე მძლავრი და ხშირი იყო ანტივაქსერთა საპროტესტო გამოსვლები, ვირუსის რამდენიმე კერა წარმოიშვა და შექმნა ე.წ. Green pass-ის მოწინააღმდეგეთა კლასტერები.