იტალია Green pass-თან დაკავშირებულ რეგულაციებს ცვლის?!

იტალია კოვიდ-19-ის მორიგ, მეოთხე ტალღაზე გადავიდა. დღევანდელი მონაცემებით დაინფიცირების ინდექსი 2.06 პროცენტია, მაშინ როდესაც ზაფხულის პერიოდში 1 პროცენტს არ აჭარბებდა. მიუხედავად იმისა, რომ იტალიაში ამ ეტაპზე სიტუაცია კონტროლის ქვეშაა, მოახლოებულ საშობაო დღესასწაულებთან დაკავშირებით,  ხელისუფლება Green pass-თან დაკავშირებული რეგულაციების შეცვლას აპირებს, რადგან სხვა ქვეყნებში მიმდინარე პროცესები, შეშფოთების მიზეზს ნამდვილად იძლევა.

აღმოსავლეთ ევროპის ქვეყნებში მდგომარეობა სავალალოა. გერმანია ისევ "სმარტვორქინგზე" გადასვლას ფიქრობს, ხოლო ავსტრიაში, დღეიდან, არავაქცინირებული მოსახლეობისათვის ნაწილობრივი "ლოქდაუნი" გამოცხადდა.

ამ ყველაფრის ფონზე, იტალიის ხელისუფლებამ, უკვე არსებული რეგულაციების გადახედვა გადაწყვიტა და შესაძლოა სულ მასე Green pass-თან დაკავშირებული ახალი რეგულაციები ვიხილოთ. საუბარია მწვანე საშვის ხანგრძლივობაზე, რომელიც შესაძლოა ერთ წლიდან ცხრა თვემდე შემცირდეს, ხოლო სწრაფი ტესტის პასუხი ვალიდური არა 48 საათის, არამედ 24 საათის განმავლობაში იყოს. სერტიფიკატის ვადების შემცირება ბოლო მონაცემების საფუძველზე იგეგმება. დაკვირვების შედეგად ირკვევა, რომ ვაქცინის ეფექტი მეორე დოზის გაკეთებიდან ექვს თვეში იწყებს შემცირებას, მაგრამ დაცვის ეფექტი მთლიანად არ ქრება. სწორედ ამიტომ განიხილება მესამე დოზის გაკეთება, მაქსიმალურად ოპერატიულად და შესაბამის ვადებში.

ამ ეტაპზე იტალიის მოსახლეობის 86% კოვიდ ვაქცინის ერთი დოზით მაინც არის აცრილი და თუ ევროპის სხვა ქვეყნებისა და იტალიის მდგომარეობას შევადარებთ, ფაქტია, რომ ვაქცინაციის კამპანიამ და Green pass-ის პოლიტიკამ შედეგი გამოიღო, აცხადებს ყველაზე დიდი იტალიური გამოცემა "Corriere della sera".