რა შემოსავალია საჭირო იტალიაში გრძელვადიანი ბინადრობის ნებართვის მისაღებად?!

იტალიაში ბინადრობის ნებართვის შესახებ, ყველაზე ხშირად დასმულ შეკითხვებს შორის არის კითხვა - რა წლიურ ფინანსურ შემოსავალს უნდა ფლობდეს პირი, რომელსაც იტალიაში, ბინადრობის გრძელვადიანი ნებართვის (Il permesso UE per soggiornanti di lungo periodo) მიღება სურს?

გარდა იმისა, რომ პირს იტალიის ტერიტორიაზე მინიმუმ 5 წლიანი ლეგალურად ცხოვრების დამადასტურებელი საბუთი უნდა ჰქონდეს და ფლობდეს იტალიური ენის სერტიფიკატს A2, ასევე სავალდებულოა ფინანსური გარანტია, იგულისხმება, პირის მუდმივი შემოსავალი.

სავალდებულო თანხის ქვედა ზღვარი, პერიოდულად იცვლება. ბოლო მონაცემებით ერთ სულზე, წელიწადში 5 984 ევრო, ანუ თვეში დაახლოებით 460 ევრო უნდა ფიქსირდებოდეს, მეცამეტე ხელფასის ჩათვლით. 

აღნიშნული ინფორმაციის გადამოწმება ნებისმიერ დროს შეგიძლიათ სოციალური უზრუნველყოფის ეროვნული ინსტიტუტის (INPS) საიტზე. 

თუ მოთხოვნის გაკეთება პირს ოჯახის წევრებზეც სურს, აღნიშნული თანხა იზრდება. თითო წევრზე დამატებით უნდა გაითვალისწინოთ ძირითადი თანხის ნახევარი, ხოლო ორი ან ორზე მეტი არასრულწლოვნის შემთხვევაში (-14წ) თანხა ორმაგდება და შესაბამისად ხდება დაახლოებით 11 968 ევრო.

შესაძლებელია, ოჯახის სრულწლოვანმა წევრებმა განაცხადის გაკეთებისას შემოსავალი გააერთიანონ და ამგვარად მიიღონ სასურველი რიცხვი. რაც მთავარია, შემოსავალი უნდა იყოს ოფიციალური და უნდა დასტურდებოდეს საშემოსავლო დოკუმენტაციით.

ნინა მამუკაძე