რატომ არ შეუშვეს უკრაინის სახალხო დამცველი გლდანის საპატიმროში?

უკრაინის სახალხო დამცველი საერთაშორისო ორგანიზაციებს მიმართავს,უკრაინის მოქალაქის, მიხეილ სააკაშვილის უფლებების დარღვევის გამო.

ლუდმილა დენისოვა ფეისბუკის გვერდზე წერს, რომ განცხადებები უკვე გაუგზავნა გაეროს და ევროსაბჭოს წამების პრევენციის კომიტეტებს, ადამიანის უფლებების საკითხებში გაეროს უმაღლეს კომისარს და ევროსაბჭოს კომისარს, ასევე ეუთოს ხელმძღვანელს.

დენისოვა იმედს გამოთქვას,რომ საერთაშორისო თანამეგობრობა უზრუნველყოფს მიხეილ სააკაშვილის სიცოცხლის, უსაფრთხოების, შესაბამისი სამედიცინო დახმარების და სამართლიანი სასამართლოს უფლებებს. 

16 ნოემბერს, მესამე პრეზიდენტის, ამჟამად უკრაინის მოქალაქის მოსანახულებლად მისული, უკრაინის სახალხო დამცველი გლდანის სასჯელაღსრულების მე-18 დაწესებულებაში არ შეუშვეს.

მან ჟურნალისტებს განუცხადა, რომ მიხეილ სააკაშვილზე ფსიქოლოგიური და მორალური ზეწოლა გრძელდება.

უარის მიზეზებზე არაერთი განმარტება გააკეთა საქართველოს მთავრობის წევრებმა და პარტია „ქართული ოცნების“ ლიდერებმა.

ირაკლი კობახიძე: „სჯობს უკრაინის სახალხო დამცველმა მეტი ყურადღება იმ „ათასობით“ პატიმარს დაუთმოს, რომლებიც უკრაინულ ციხეებში ჰყავს“.

ირაკლი ქადაგიშვილი: „საქართველო, ეს არ არის ყველას ფეხების შესაწმენდი ქვეყანა. უკრაინის დეპუტატი იქნება, თუ სახალხო დამცველი, კეთილი უნდა ინებოს და პატივი სცეს ჩვენი ქვეყნის სუვერენიტეტს“.

გიორგი ვოლსკი:„უკრაინის სახალხო დამცველი იქნება, თუ დეპუტატი ვისიც გინდა იყოს, თუნდაც ჟურნალისტი გორდონი, რომელიც შემოდის ქვეყანაში, როცა მათ უარს ეუბნებიან შემოსვლაზე, განპირობებულია იმით, რომ ისინი თავის მოვალეობის შესასრულებლად კი არ მოდიან, არამედ იმისთვის, რომ დესტაბილიზაციის პროცესი გააღვივონ, განავითარონ და დამატებითი საწვავი შესძინონ ამ დესტაბილიზაციის მცდელობას, რაც პირადად მიხეილ სააკაშვილს და ნაცმოძრაობას გააჩნია“.

იუსტიციის მინისტრი, რატი ბრეგაძე: „საქართველოს კანონმდებლობით, არ არის გათვალისწინებული საქართველოს პენიტენციურ დაწესებულებაში უკრაინის სახალხო დამცველის შესვლა, არ არის ამის აუცილებლობა, არ გვაქვს ჩვენ ამის ვალდებულება“.

ის რომ საშუალება არ მიეცა უკრაინის სახალხო დამცველს, მსჯავრდადებულის მონახულების, შეაფასეს ოპოზიციაში.

„ევროპული საქართველოს“ წევრი, გიორგი ნონიაშვილი: ეს ქვეყანა ძალაუფლებას იყენებს ბოროტად და არასწორი გეზით, რომელიც ჩრდილოეთისკენ მიდის, ასე იქცევიან "პუტინის ბანაკის" წევრები“.

„მოულოდნელი და მიუღებელი“ ასე შეაფასა გლდანის საპატიმროში უკრაინის სახალხო დამცველის არ შეშვების ფაქტი, საქართველოს სახალხო დამცველმა. როგორც ნინო ლომჯარიამ თქვა, საქართველომ პატივი უნდა სცეს ადამიანის უფლებათა დაცვის ორგანიზაციებს. 

ფაქტს გამოეხმაურა, ასევე საქართველოს ყოფილი სახალხო დამცველი. უჩა ნანუაშვილმა თქვა, რომ „საქართველოს ხელისუფლება იზიარებს იმ პრაქტიკას, რომელიც რუსეთშია დამკვიდრებული წლების განმავლობაში“.

უკრაინის სახალხო დამცველმა ლუდმილა დენისოვამ მიხეილ სააკაშვილი ციხეში ერთხელ უკვე, 27 ოქტომბერს მოინახულა.

საქართველოს მესამე პრეზიდენტი მიხეილ სააკაშვილი  48-ე დღეა შიმშილობს. 9 დღეა, რაც იგი რუსთავის ციხიდან გლდანის ციხის სამკურნალო დაწესებულებაში გადაიყვანეს. სააკაშვილი საკვებ დანამატებს 11 დღეა აღარ იღებს.

11 ნოემბერს მან განაცხადა, რომ მზად არის შიმშილობა შეწყვიტოს, თუმცა, მხოლოდ იმ შემთხვევაში, თუ მაღალტექნოლოგიურ კლინიკაში გადაიყვანენ.

ქვეყნის მესამე პრეზიდენტი 2021 წლის 1 ოქტომბერს თბილისში დააკავეს.

საქმეები, რომელზეც მიხეილ სააკაშვილს ბრალი აქვს წაყენებული: „გირგვლიანის საქმე“ „ვალერი გელაშვილის ცემის საქმე“, „ტელეკომპანია იმედში შეჭრის და დარბევის საქმე“, „სახელმწიფოს კუთვნილი ქონების გაფლანგვის საქმე“ და ასევე „საქართველოს საზღვრის უკანონოდ გადმოკვეთის საქმე“. 

ამავე თემაზე:

🔵პაატა ბურჭულაძემ შიმშილობა დაიწყო 

🔵ექიმი: მიხეილ სააკაშვილი, ჯერ არ საჭიროებს რეანიმაციულ ღონისძიებებს, თუმცა მას სჭირდება ინტენსიური თერაპია