ექიმი: მიხეილ სააკაშვილი, ჯერ არ საჭიროებს რეანიმაციულ ღონისძიებებს, თუმცა მას სჭირდება ინტენსიური თერაპია

მიხეილ სააკაშვილის ჯანმრთელობის მდგომარეობა ძალიან მძიმე არ არის, მაგრამ მდგომარეობა ძალიან ახლოსაა იმისკენ, რომ რამდენიმე დღეში დამძიმდეს, - ამის შესახებ სახალხო დამცველის მიერ შექმნილი ექსპერტთა ჯგუფის წევრმა, ანესთეზიოლოგ - რეანიმატოლოგმა გიორგი გრიგოლიამ განაცხადა.

ექიმმა ციხის სამკურნალო დაწესებულების  დატოვების შემდეგ ჟურნალისტებს უთხრა, რომ პაციენტი, როგორიც დღეს მიხეილ სააკაშვილია, ჯერ არ საჭიროებს რეანიმაციულ ღონისძიებებს, თუმცა მას სჭირდება ინტენსიური თერაპია.

„სააკაშვილი ნამდვილად შიმშილობს, ამას ადასტურებს ყველა, ვინც იქ არის. მდგომარეობა ვერ ვიტყვი, რომ საკმაოდ მძიმეა, მაგრამ ძალიან ახლოს არის იმისკენ, რომ რამდენიმე დღეში დამძიმდება. მის ანალიზებში არის ისეთი ცვლილებები, რომელიც საჭიროებს ინტენსიურ თერაპიას და მკურნალობას", - განაცხადა გიორგი გრიგოლიამ.

„რაც შეეხება ინფრასტრუქტურას, ეს ინფრასტრუქტურა შექმნილია 2 კვირის წინ, არის ინტენსიური თერაპიის პალატა გაკეთებული, საკმაოდ კარგად აღჭურვილი, თანამშრომლები გადმოყვანილია რესპუბლიკური საავადმყოფოდან, იქ არის ანესთეზიოლოგი, რეანიმატოლოგი და მორიგე ექიმი ყოველ დღე, მაგრამ უარყოფითი არის ის, რომ რეიტენსიური თერაპიის გამოცდილება ამ დაწესებულებას არ აქვს“. - თქვა ექიმმა.

ექსპერტთა ჯგუფი მიხეილ სააკაშვილის ჯანმრთელობის მდგომარეობის შესახებ დასკვნას დღეს მოამზადებს და  საღამოს ჩანიშნულ საგანგებო ბრიფინგზე გაასაჯაროებს.

გლდანის სასჯელაღსრულების მე-18 დაწესებულებაში ქვეყნის მესამე პრეზიდენტის მოსანახულებლად და ადგილზე არსებული ვითარების გასაცნობად სახალხო დამცველის მიერ შექმნილი ექსპერტთა ჯგუფი რამდენიმე საათის განმავლობაში იმყოფებოდა. 

სხვა სიახლეები:

🔵 ხანძარი ბათუმში - დაშავებული არავინ არის (ვიდეო)