"ადამიანის მოტყუებით წაყვანა არის გატაცება. სტრასბურგის სასამართლოში იქნება ყველაფერი ნათქვამი" - ნიკა გვარამია

მიხეილ სააკაშვილის ადვოკატის, ნიკა გვარამიას განცხადებით, პატიმარ ექსპრეზიდენტის მოტყუებით გადაყვანასთან დაკავშირებით, სამართლებრივი რეაგირებისთვის სტრასბურგის სასამართლოს მიმართავენ.

"ადამიანის მოტყუებით თავისუფლების აღკვეთა და წაყვანა არის გატაცება, მაგას მეტი არაფერი ჰქვია. ამას გარდა, ნინო ლომჯარია რამდენად მე ვიცი ადასტურებს, რომ დაზიანებას აქვს ადგილი, უბრალოდ ექიმმა უნდა ნახოს, რისი დამტკიცებაც გვინდოდა და ამისთვის ვაპირებ იქ შესვლას, მეც უნდა მოვისმინო პირადად ჩემი დაცვის ქვეშ მყოფისგან ეს ყველაფერი, იმიტომ რომ ხვალ ვაპირებთ მყისიერ სამართლებრივ რეაგირებას დილიდან და მე მჭირდება ჩემი დაცვის ქვეშ მყოფის ჩვენება ამასთან დაკავშირებით.

ვიმეორებ, რომ დილიდან და ეს არ ხდება საქართველოში, მოხდება სხვაგან, ამიტომ ამ წუთში მე მიზღუდავენ, როგორც ადვოკატს, მოვიპოვო ჩვენება ტერორისტულ აქტთან, თუ გატაცებასთან დაკავშირებით და წავიღო პირდაპირ ვთქვათ, სტრასბურგის სასამართლოში.

ამ წუთში მიზღუდავენ ამას და რა თქმა უნდა, ამის შესახებაც სტრასბურგის სასამართლოში იქნება ყველაფერი ნათქვამი", - განაცხადა ნიკა გვარამიამ.

პენიტენციური სამსახურის ინფორმაციით, ჯანმრთელობის მდგომარეობის გაუარესების პრევენციის მიზნით და მომატებული საფრთხეებიდან გამომდინარე პატიმარი მიხეილ სააკაშვილი გადაყვანილია მე-12 პენიტენციური დაწესებულებიდან N18 ბრალდებულთა და მსჯავრდებულთა სამკურნალო დაწესებულებაში.

მანამდე ექსპრეზიდენტის პირადმა ექიმმა ნიკოლოზ ყიფშიძემ განაცხადა, რომ კონსილიუმმა მიხეილ სააკაშვილის სამოქალაქო კლინიკაში დაუყოვნებლივ გადაყვანის გადაწყვეტილება მიიღო.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.

მიხეილ სააკაშვილი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, მე-40 დღეა შიმშილობს. 

ასევე დაგაინტერესებთ:

🔲 "გადმომათრიეს მანქანიდან, კრიმინალების გინების ქვეშ გამათრიეს მიწაზე და რამდენჯერმე ჩამარტყეს კისერში, მითრიეს თმებით, ამ დროს გავუწიე წინააღმდეგობა" - მიხეილ სააკაშვილი

🔲 სახალხო დამცველი: სააკაშვილმა იცოდა, რომ ის სამოქალაქო კლინიკაში უნდა გადაეყვანათ