ადვოკატი: სააკაშვილი მზად არის შეხვდეს ამჟამად მოქმედ კონსილიუმს

საქართველოს ყოფილი პრეზიდენტის, მიხეილ სააკაშვილის ადვოკატის, შოთა თუთბერიძის განაცხადებით, სააკაშვილი მზად არის შეხვდეს ამჟამად მოქმედ კონსილიუმს, თუმცა კვლავ ითხოვს ალტერნატიული კონსილიუმის შექმნას.

მისივე თქმით, ინფორმაცია, თითქოს მიხეილ სააკაშვილი ეწინააღმდეგებოდა ექიმების ვიზიტს, გახლავთ დეზინფორმაცია.

„მიხეილ სააკაშვილი ცხადია, ითხოვს პარიტეტული კონსილიუმის დაუყოვნებლივ ფორმირებას და რაც შეიძლება სწრაფად შესვლას ციხეში. მიუხედავად ამისა, ის არც ერთი წუთით არ ეწინააღმდეგება ამჟამად არსებული კონსილიუმის ვიზიტს, მზად არის, შეხვდეს როგორც მთლიანი კონსილიუმის შემადგენლობას, ისე მათ ინდივიდუალურად.

ასევე ვფიქრობთ და მოვითხოვთ, ვიდრე პარიტეტული კონსილიუმი შეიქმნება, მიხეილ სააკაშვილთან განხორციელდეს ამჟამად მოქმედი კონსილიუმის ვიზიტი, ყველანაირი შეფერხებისა და ხელოვნური ბარიერების გარეშე ისე, რომ ექიმებს, ადამიანებს, რომელთაც ევალებათ მესამე პრეზიდენტის სიცოცხლისა და ჯანმრთელობის დაცვა, ჰქონდეთ საშუალება, ნებისმიერ დროს საკუთარი შეხედულებისა და საჭიროებისამებრ შეძლონ სააკაშვილთან ვიზიტი.

ჩვენ უკვე კონსიულიუმს ველოდებით, ნებისმიერ დროს შეიძლება კონსილიუმის წევრები აქ მოვიდნენ და შეხვდნენ პრეზიდენტს", – განაცხადა ადვოკატმა.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან შიმშილობს. იგი ამჟამად იმყოფება სასჯელაღსრულების სისტემის მე-18 სამკურნალო დაწესებულებაში. 11 ნოემბერს მიხეილ სააკაშვილმა განაცხადა, რომ მაღალტექნოლოგიურ კლინიკაში, გარდა გორის სამხედრო ჰოსპიტლისა, გადაყვანის შემთხვევაში, მზად არის შიმშილობა შეწყვიტოს.

ამავე თემაზე:

🔲 "გადავწყვიტე ხვალ წამოვიდე საქართველოში, ვიწყებ შიმშილობას, ხელოვანებო შემომიერთდით" - პაატა ბურჭულაძე

🔲 "მიხეილ სააკაშვილის სიცოცხლეს საფრთხე არ ემუქრება, თავი შეიკავეთ სიტუაციის დრამატიზაციისგან" - გლდანის ციხის სამკურნალო დაწესებულების მთავარი ექიმი

🔲 "ერთი ასანთის გაკვრა და მოგებული აქედან ვეღარავინ გამოვა" - ნათია ფანჯიკიძე