"ჭრილობა მიაყენა ყელსა და ლოყაზე" -კოვიდპაციენტმა კოვიდ კლინიკაში მორიგე ექთანი დაჭრა

"პაციენტმა ექთანს სახის მიმდებარედ 2 ჭრილობა მიაყენა – ერთი ლოყის არეში, სადაც მას შვიდი ნაკერი დასჭირდა და რამაც დააზიანა სანერწყვე ჯირკვალი, ხოლო მეორე – ყელის არეში", - ამის შესახებ "ექიმთა უფლებების დაცვის ორგანიზაციის" თავმჯდომარე სალომე ლოლუამ "მედიაცენტრ მთავარში"  სპეციალურ ბრიფინგზე განაცხადა.

როგორც სალომე ლოლუამ აღნიშნა, ზოგადად, პანდემიის პერიოდში მედპერსონალზე თავდასხმისა და მათი შეურაცხყოფის ფაქტები გახშირდა.

ერთ-ერთი ასეთი შემთხვევა კი გასული წლის 21 დეკემბერს მოხდა.

"დილის 5 საათზე, ინტენსიური თერაპიის განყოფილებაში, ექთანმა შემოვლის დროს შეამჩნია, რომ პაციენტი წუხდა.

დაინტერესდა პაციენტით, მივიდა მასთან, მიაწოდა ჟანგბადის ნიღაბი და უნდოდა მისთვის სისხლში ჟანგბადის კონცენტრაცია განესაზღვრა.

დაიხარა სატურაციის აპარატის ასაღებად და სწორედ ამ დროს, პაციენტმა ის დაიჭირა კისრით და ყელის მიმართულებით, რამდენჯერმე ბასრი იარაღით დაარტყა",  – განაცხადა სალომე ლოლუამ.

მისივე თქმით, ამ ეტაპზე ექთნის ჯანმრთელობის მდგომარეობა დამაკმაყოფილებელია.

"ეს პაციენტი 2 კვირის განმავლობაში იმყოფებოდა ინტენსიურ განყოფილებაში.

ექთანსაც რამდენჯერმე მოუწია ამ პერიოდში მორიგეობა, ზრუნავდა პაციენტზე", – ამბობს ლოლუა და დასძენს, რომ ამ ეტაპზე ასოციაცია თავს იკავებს პაციენტის, ექთნისა და კლინიკის დასახელებისგან.

მისივე თქმით, კაცი ამჟამად გადაყვანილია მე-12 პენიტენციურ დაწესებულებაში, გამოძიება ჯერ არ დასრულებულა.

სხვა სიახლეები:

🔳  ნათია მეზვრიშვილი: ჩვენი პარტია ისევ გამორიცხავს "ნაციონალურ მოძრაობასა" და ნებისმიერ სხვა პარტიასთან სისტემურ კოალიციას 

🔳  მესტიის თამარ მეფის სახელობის აეროპორტმა სერტიფიცირება გაიარა

🔳  „23 წლის სრულიად ჯანმრთელი ვაჟკაცი კოვიდმა იმსხვერპლა“ - ღუდუშაურის კლინიკის თანამშრომელს დავით პაპასკირს მეგობრები ემშვიდობებიან