გიორგი კალანდია: არანაირი მშვიდობიანი დამხობა არ არსებობს, დამხობა არის დამხობა

არანაირი მშვიდობიანი დამხობა არ არსებობს, დამხობა არის დამხობა!, - განაცხადა საზოგადოება „ქართულის“ წევრმა გიორგი კალანდიამ გადაცემაში „იმედი LIVE“, რითაც კონკრეტული ჯგუფის მიერ ხელისუფლების დამხობის მცდელობას გამოეხმაურა.

„მე მახსოვს, როდესაც კანონიერ პრეზიდენტს (ზვიად გამსახურდია) ამხობდნენ, სამწუხაროდ ევროპიდან არანაირი ღირებული სიგნალი არ ყოფილა. მე დღემდე არ მაქვს პასუხი, რატომ ჩაიგუბა მაშინ ცივილიზებულმა სამყარომ პირში წყალი, როდესაც საქართველოში კანონიერი ხელისუფლება დაამხვეს, ამაზე პასუხი არ არსებობს, მაგრამ ამაზე ისტორიული შეფასება გაჩნდება.

გუშინდელმა დღემ ერთი რამ დაადასტურა, რომ ჩვენი ხალხი ბრძენთან ერთად არის ძალიან გამოცდილი. დიდი ისტორიული გაკვეთილები გვაქვს მიღებული.

ასევე მინდა აღვნიშნო, რომ ძალიან მწყდება გული იმაზე, რომ დღეს არ არის საერთო სახალხო აღშფოთება იმაზე, როდესაც ვნახეთ, რომ ჟურნალისტსა და ოპერატორს გაზი შეასხურეს, რატომ ჩაიგუბეს ზოგიერთმა ჟურნალისტებმა პირში წყალი?!“, - აღნიშნა გიორგი კალანდიამ.

4 ოქტომბერს, რადიკალური ოპოზიციის მხარდამჭერები პრეზიდენტის სასახლის ეზოში შეიჭრნენ. მათ ჯებირები დააზიანეს და ეზოში შეღწევა შეძლეს, თუმცა, მათ სამართალდამცველებმა ეზო მალევე დაატოვებინეს.

მალევე შინაგან საქმეთა სამინისტროს თანამშრომლებმა პაატა ბურჭულაძე, მურთაზ ზოდელავა, ირაკლი ნადირაძე, პაატა მანჯგალაძე და ლაშა ბერიძე დააკავეს. მათ ბრალად ედებათ საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდება, ასევე ჯგუფური ძალადობის ორგანიზება, ხელმძღვანელობა და მასში მონაწილეობა. დანაშაულები 9 წლამდე ვადით თავისუფლების აღკვეთას ითვალისწინებს.

5 ოქტომბერს კი, სახელმწიფო უსაფრთხოების სამსახურმა საგამოძიებო მოქმედებების შედეგად დიდი რაოდენობით ცეცხლსასროლი იარაღი, საბრძოლო მასალა და ასაფეთქებელი ნივთიერებები დეტონატორით აღმოაჩინა.