თორნიკე ჭეიშვილი: საზოგადოების აბსოლუტურ უმრავლესობას სურს მშვიდობა, ოპოზიციას კი სამუშაო მაგიდაზე ჰქონდა აბსოლუტურად დესტრუქციული გეგმა, რომელიც უნდა ყოფილიყო განსხეულებული სახელმწიფო გადატრიალებაში, ხელისუფლების დამხობაში

იურიდიულ საკითხთა საპარლამენტო კომიტეტის თავმჯდომარის პირველმა მოადგილემ თორნიკე ჭეიშვილმა გადაცემაში „იმედი LIVE“ 4 ოქტომბრის არჩევნებში „ქართული ოცნების“ გამარჯვება შეაფასა და ოპოზიციის დესტრუქციულ გეგმებსა და სახელმწიფო გადატრიალების მცდელობაზე ისაუბრა.

მან აღნიშნა, რომ გუშინდელი გამარჯვება თავისი შინაარსით ისტორიული გამარჯვებაა და ამომრჩეველს მადლობა გადაუხადა.

„როდესაც ჩვენ შევძელით, რომ ფაქტობრივად, გაგვემეორებინა საპარლამენტო არჩევნებზე მიღწეული შედეგი, რომელიც ასევე იყო ძალიან მაღალი ეს მეტყველებს იმაზე, რომ ჩვენს ხელისუფლებას აქვს ძალიან მტკიცე და მყარი ლეგიტიმაცია საზოგადოების მხრიდან. ბუნებრივია, ჩვენ ამ ნდობას სათანადოდ ვაფასებთ და აუცილებლად გავამართლებთ ისევე, როგორც აქამდე გაგვიმართლებია.

ამ ფონზე, როდესაც ვხედავთ, რომ აბსოლუტურ უმრავლესობას ჩვენი საზოგადოებისა სურს მშვიდობა, სტაბილურობა, განვითარება ამ ქვეყანაში, ოპოზიციას ჰქონდა თავის სამუშაო მაგიდაზე დადებული აბსოლუტურად დესტრუქციული სამოქმედო გეგმა, რომელიც პირდაპირ უნდა ყოფილიყო განსხეულებული სახელმწიფო გადატრიალებაში, ხელისუფლების დამხობაში და გუშინდელმა დღემ ეს დაადასტურა”, - განაცხადა თორნიკე ჭეიშვილმა.

დეპუტატმა ასევე გაიხსენა ოპოზიციის ის განცხადებები, რომლებიც დაანონსებულ სახელმწიფო გადატრიალებას უსწრებდა წინ.

„ამაზეც არაერთი სპეკულაცია იყო, ყველას კარგად გვახსოვს, როდესაც ისინი ცდილობდნენ, რომ როგორმე შეეფუთათ თავისი ექსტრემისტული ზრახვები. თუ ამას გავიხსენებთ, დავრწმუნდებით იმაში, რომ მიზანი რა თქმა უნდა, იმთავითვე იყო სწორედაც ხელისუფლების ძალადობრივი გზით შეცვლა და ყველაფერს აკეთებდნენ ამისთვის. ისინი წამოცდენის ცდილობდნენ, საკუთარ ამომრჩეველში, რომელიც, რომელიც როგორც ვხედავთ, ძალიან ცოტა დარჩა და სულ რამდენიმე ათასი ადამიანი გამოვიდა მათ ამ შემოძახილზე, გაეღვივებინათ ეს ექსტრემისტული განცდები”, - განაცხადა ჭეიშვილმა.

მან ასევე აღნიშნა, რომ მუშაობდა სხვა სქემებიც.

„საზოგადოებამ იხილა ერთი მხრივ, დაფინანსების ის სქემები, რომლებიც გამჭვირვალობის კანონმდებლობის გვერდის ავლით იყო მიმართული იმაზე, რომ უმაღლესი საგანმანათლებლო დაწესებულებების ჩართულობით მომხდარიყო ახალგაზრდების გადამზადება. მომხდარიყო მათი მომზადება იმისათვის, რომ ისინი ბოლომდე ჩართულიყვნენ ექსტრემისტულ პროცესებში. ასევე იყო სხვა მექანიზმები, რომელთა შემთხვევაში ძალიან მკაფიოა, რომ პირდაპირ იკითხება უცხოური სპეცსამსახურების ხელწერა.

შესაბამისად, აქ ადგილობრივი „ლიდერების“ გამოყენებით, ქვეყნისადმი მტრულად განწყობილი ძალები ცდილობდნენ და მათ შორის ავანგარდში არის ის, რასაც ჩვენ ვუწოდებთ „დიფ სთეითს“, რომ მომხდარიყო მათთვის სასურველი მარიონეტული რეჟიმის მოყვანა ქვეყნის მართვის სადავეებში იმისათვის, რომ შემდგომში განევითარებინათ მოვლენები იმ სცენარით, რომელიც კარგს არაფერს უქადის საქართველოს. სამწუხაროდ, ძალიან დიდია სურვილი იმისა, რომ საქართველო და ჩვენი მოსახლეობა იქცეს ერთი მხრივ პლაცდარმად და მეორე მხრივ - საზარბაზნე ხორცად შავ-ბნელ გეგმებში”, - განაცხადა თორნიკე ჭეიშვილმა.