გიორგი სოსიაშვილი ევროპასთან ურთიერთობაზე: დიდი სურვილი გვაქვს, რომ გადაიტვირთოს ეს ურთიერთობა, მაგრამ ეს ურთიერთობა თანასწორ საწყისებზე უნდა იყოს - არ შეიძლება, რაღაც სიყალბე შემოგაჩეჩონ და ქვეყანაში კვებონ რადიკალიზაცია, ექსტრემიზმი

განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, საპარლამენტო უმრავლესობის წევრმა გიორგი სოსიაშვილმა გადაცემაში „დღის ქრონიკა“ ევროპასთან ურთიერთობაზე და ამ ურთიერთობის გადატვირთვაზე ისაუბრა.

დეპუტატმა აღნიშნა, რომ საქართველოს ისტორიული განვითარების გზა ევროპისკენ მიემართება და საქართველო ევროპული ცივილიზაციის თანაშემოქმედია.

მან ევროპასთან ურთიერთობის გადატვირთვის სურვილს და მზაობას გაუსვა ხაზი.

„ჩვენ ძალიან დიდი სურვილი გვაქვს, რომ გადაიტვირთოს ეს ურთიერთობა, სუფთა ფურცლიდან დავიწყოთ ურთიერთობა ევროპის სახელმწიფოებთან, ევროპის ლიდერებთან, მაგრამ ეს ურთიერთობა თანასწორ საწყისებზე უნდა იყოს. არ შეიძლება, რაღაც სიყალბე შემოგაჩეჩონ და ქვეყანაში კვებონ რადიკალიზაცია, ექსტრემიზმი და თავიანთი ფულით დაფინანსებულ არასამთავრობო ორგანიზაციებსა და მათთან მყოფ ძალებს მოუწოდებდნენ ხელისუფლების წინააღმდეგ ბრძოლისაკენ.

წარმოუდგენელია ასეთ სიტუაციაში ურთიერთობა. თუკი ბრიუსელი რიტორიკას შეცვლის, შეცვლიან დამოკიდებულებას ჩვენდამი და საქართველოს განიხილავენ, როგორც სუვერენულ, ღირსებით სავსე, დიდი ისტორიით სავსე სახელმწიფოს, რომელსაც სურვილი აქვს, გაწევრიანდეს ევროპულ ოჯახში თავისი ღირსებით, თავაწეული შევიდეს იქ და არა ასე - ბულინგით, შეურაცხყოფილი, ღირსებაზე ყოველდღიურად ხელის წამოკვრით, რა თქმა უნდა, ჩვენ მზად ვართ გადატვირთვისთვის იმიტომ, რომ ჩვენი ბუნებრივი გზა არის ევროპულ ოჯახში.

ოღონდ ეს გზა არის ღირსეულ ევროპულ ოჯახში გაწევრიანება, ისეთ ევროპულ ოჯახში არ გვინდა გაწევრიანება, სადაც საუბარია ფსევდო ფასეულობებზე, ერთნაირსქესიანთა ქორწინებაზე და ამ ქორწინების დაკანონებაზე, რასაც ახლა აიძულებენ უკრაინის ხელისუფლებას. ჩვენს წინაპრებს როგორ უნდა წარმოედგინათ, როდესაც უამრავი წერილს გზავნიდნენ საქართველოდან ევროპის ევროპის ლიდერების სახელზე, რომლებშიც გადარჩენას ევედრებოდნენ. ქრისტიანობის გადარჩენას სთხოვდნენ საქართველოში, რომ 21-ე საუკუნეში ქრისტიანულ ფასეულობებზე გარკვეული იერიში იქნებოდა მოტანილი ზოგიერთი ევროპელი ლიდერის მიერ და ამის დაცვა მოგვიწევდა ჩვენ”, - განაცხადა სოსიაშვილმა.