გიორგი სოსიაშვილი: პრემიერ-მინისტრის თითოეული ინიციატივა ორიენტირებულია ჩვენი მოქალაქეების კეთილდღეობის გაუმჯობესებაზე, სამშვიდობო პოლიტიკასა და ქვეყნის წინსვლაზე

განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, საპარლამენტო უმრავლესობის წევრმა, გიორგი სოსიაშვილმა „დღის ქრონიკაში“ სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი პარლამენტის დროებითი კომისიის მუშაობაზე ისაუბრა.

როგორც სოსიაშვილმა აღნიშნა, პრემიერის, ირაკლი კობახიძის ინიციატივა, ფასების შემსწავლელი სამთავრობო კომისიის შექმნასთან დაკავშირებით, დროული იყო.

„პრემიერ-მინისტრის თითოეული ინიციატივა ორიენტირებულია ჩვენი მოქალაქეების კეთილდღეობის გაუმჯობესებაზე, სამშვიდობო პოლიტიკასა და ქვეყნის წინსვლაზე. ეს ინიციატივაც იყო დროული, რადგან საზოგადოება უკვე შეწუხებული იყო მზარდი ფასებით და ამიტომაც პრემიერმა შექმნა სამთავრობო კომისია და მას მერე შეიქმნა საპარლამენტო ჯგუფი.

ჩვენი მიზანია დავადგინოთ მიზეზები, რომ საქართველოში, სურსათის პროდუქტებზე არ იყოს ხელოვნური ფასნამატები. ჩვენი მიზანია გამოვიკვლიოთ ეს მიზეზები და ბიზნესსექტორთან ურთიერთობით, საბაზო ეკონომიკის პრინციპების დაცვით, ბალანსის შენარჩუნებით მოხდეს ამ მიზეზების დადგენა და გარკვეული რეგულაციების მიღება, რომელიც ფასებს დაასტაბილურებს“, - აღნიშნა გიორგი სოსიაშვილმა.