იტალიაში, რუსეთის მოთხოვნით, უკრაინელი რეჟისორი დააპატიმრეს

იტალიაში, რუსეთის მოთხოვნით, უკრაინელი რეჟისორი ევგენი ლავრენჩუკი დააპატიმრეს.

ცნობილი არტისტი, ექსტრადიციის საკითხის მოგვარებამდე პატიმრობაში რჩება. ამის შესახებ უკრაინის საგარეო საქმეთა სამინისტროს პრეზიდენტმა ოლეგ ნიკოლენკომ განაცხადა და დაამატა, რომ რეჟისორს ჰყავს ადვოკატი და საკონსულოს მეთვალყურეობის ქვეშ იმყოფება.

იტალიელმა სამართალდამცველებმა ოდესას საოპერო თეატრის დირექტორი ლავრენჩუკი, 17 დეკემბერს, ნეაპოლში დააკავეს მაშინ, როდესაც თვითმფრინავით იტალიის დატოვებას აპირებდა. 

რეჟისორს, უკრაინის კონსული ბოლოს 31 დეკემბერს შეხვდა და განაცხადა, რომ პატიმრის ჯანმრთელობის მდგომარეობა დამაკმაყოფილებელია და მისაღებ პირობებშიც იმყოფება.

ვინ არის ევგენი ლავრენჩუკი?

უკრაინელი რეჟისორი წარმოშობით ლვოვიდანაა. განათლება რუსეთში და პოლონეთში მიიღო. დიდი ხნის განმავლობაში რუსეთში ცხოვრობდა, სადაც მოსკოვში არსებულ პოლონურ თეატრს ხელმძღვანელობდა.

რუსეთი დონბასის სამხედრო აგრესიის დაწყებისთანავე დატოვა და ხმამაღლა დააფიქსირა საკუთარი მოსაზრება, რომ რუსეთის მოქმედებები უკრაინის წინააღმდეგ, კრიმინალური იყო.

2021 წლის მარტში მან უკრაინის საპატიო არტისტის წოდება მიიღო და ამჟამად ოდესის ოპერისა და ბალეტის აკადემიური სახელმწიფო თეატრის დირექტორია.