კორონავირუსის ახალი შტამი „ომიკრონი“ უმრავლეს შემთხვევაში აუცრელ მოქალაქეებს უდასტურდებათ - გიორგი კამკამიძე

„კორონავირუსის ახალი შტამი „ომიკრონი“ უმრავლეს შემთხვევაში ვრცელდება იმ პოპულაციაში, რომელიც აცრილი არ არის“, - ამის შესახებ ალერგოლოგ-იმუნოლოგმა გიორგი კამკამიძემ მედიაჰოლდინგ „კვირაში“ გამართულ პრესკონფერენციაზე განაცხადა.

როგორც მან აღნიშნა, „ომიკრონის“ ვირუსით გამოწვეული ინფექცია შედარებით მსუბუქად მიმდინარეობს.

მისი თქმით, ინფექცია არ ხასიათდება ნერვული სისტემის დაზიანების ნიშნებით, როგორიცაა ყნოსვისა და გემოვნების გაუკუღმართება.

„ჩვეულებრივი გაციებით მიმდინარე დაავადების სიმპტომები ახასიათებს. თუმცა, მეორე მხრივ, გავრცელების თვალსაზრისით ნამდვილად საყურადღებოა და ეფექტურად ვრცელდება, განსაკუთრებით ახალგაზრდა ასაკში.

ყურადღება უნდა გავამახვილოთ, რომ უმრავლეს შემთხვევაში ის ვრცელდება იმ პოპულაციაში, რომელიც აცრილი არ არის. ამიტომაც არის რომ ზუსტად ახალგაზრდებშია უფრო მეტად გავრცელებული,“- განაცხადა გიორგი კამკამიძემ.

როგორც იმუნოლოგმა აღნიშნა, რა საკვირველია, საქართველო მთლიანად დაცული ვერანაირად ვერ იქნება და ადრე თუ გვიან, ქვეყანაში ეს ვარიანტიც შემოაღწევს.

მისი თქმით, შეიძლება, საქართველოში არის კიდევაც ეს ვარიანტი, თუმცა, ჯერ არ ვიცით ამის შესახებ.

„ვირუსთან დაკავშირებით რაიმე სერიოზულ პრობლემებს არ ველით, ჯერ საგანგაშო მონაცემები არ არის, რომ ავადობის მიმდინარეობას ამძიმებს, პირიქით, მონაცემები იმის შესახებაა, რომ შედარებით მსუბუქად მიმდინარეობს, თუმცა, ეფექტურად ვრცელდება”,- თქვა გიორგი კამკამიძემ.

მსგავსი თემები:

🔵 "ომიკრონის" გავრცელების გამო ისრაელმა უცხო ქვეყნის მოქალაქეებისთვის საზღვარი ჩაკეტა

🔵 რომელ ქვეყნებში დაფიქსირდა ვირუსის ახალი შტამი "ომიკრონი"