რომელ ქვეყნებში დაფიქსირდა ვირუსის ახალი შტამი "ომიკრონი"

პანდემიის ორი წლის თავს ახალი და შესაძლოა, ამ დროისათვის ყველაზე სასტიკი შტამით ვხვდებით. სამხრეთ აფრიკული ახალი  შტამი  „ომიკრონი“, რომელიც პირველად 24 ნოემბერს გამოვლინდა, უკვე რამდენიმე ქვეყანაში დაფიქსირდა. როგორც ჩანს, ახლად გამოვლენილი ვარიანტი, სწრაფად ვრცელდება სამხრეთ აფრიკის ნაწილებში და მეცნიერები შეშფოთებულნი არიან, რომ მუტაციების უჩვეულოდ დიდმა რაოდენობამ შესაძლოა, ის უფრო გადამდები გახადოს. შემთხვევები ამ დრომდე დაფიქსირდა სამხრეთ აფრიკაში, დიდ ბრიტანეთში, ჩინეთში, ისრაელში, ბელგიაში, იტალიაში... გერმანია და ჩეხეთი  ახალი შტამის პირველ საეჭვო, შესაძლო შემთხვევებს იკვლევენ.

ალერგიისა და ინფექციური დაავადებების ეროვნული ინსტიტუტის დირექტორმა ენტონი ფაუჩიმ განაცხადა, რომ შესაძლებელია კოვიდ-19-ის ახალი  ვარიანტი უკვე იყოს ამერიკის შეერთებულ შტატებშიც. 

იყო მოლოდინი რომ “ნიუს” უწოდებდნენ, თუმცა, “ომიკრონი” ეწოდა და მიენიჭა “შეშფოთების” სტატუსი. გაჩნდა მოლოდინი და საფრთხე, რომ შესაძლოა კოვიდის ახალმა მუტაციამ გაზარდოს რეინფიცირების რისკი.
ეჭვობენ, რომ “დელტაზე” გადამდებია.

იტალიაში კორონავირუსის ახალი შტამით ინფიცირების პირველი შემთხვევა 28 ნოემბერს დაფიქსირდა. ინფიცირებულია პირი, რომელიც მანამდე მოზამბიკში იმყოფებოდა. ექიმების განცხადებით, პაციენტისა და მისი ოჯახის წევრების ჯანმრთელობის მდგომარეობა დამაკმაყოფილებელია.

კორონავირუსის ახალი შტამის გამო, ევროკავშირის წევრმა სახელმწიფოებმა პარასკევს დახურეს საზღვრები მოგზაურთათვის აფრიკის სამხრეთ რეგიონის შვიდი ქვეყნიდან. ესენია ბოტსვანა, ესვატინი, ლესოტო, მოზამბიკი, ნამიბია, სამხრეთ აფრიკა და ზიმბაბვე.

ჯერჯერობით უცნობია, რამდენად ეფექტური იქნება უკვე არსებული ვაქცინები ახალი შტამის წინააღმდეგ, მაგრამ შეგახსენებთ, სამხრეთ აფრიკას მოსახლეობის მხოლოდ 24% ჰყავს აცრილი. ზუსტად იმდენი, რამდენიც საქართველოს და დიდი ალბათობით, აუცრელი ქვეყნები განსაკუთრებულად მოწყვლადი იქნება ახალი შტამის მიმართ.

ელენე ფერაძე