მაია ბითაძე: ის, რაც ფინეთის საგარეო საქმეთა მინისტრმა გააკეთა, ამის საპასუხოდ მარტო შეხვედრას კი არ გაუუქმებდა სხვა ქვეყანაში პრემიერ-მინისტრი და მარტო ნოტა კი არ გაიგზავნებოდა, მარტივად, „პერსონა ნონ გრატად“ გამოაცხადებდნენ

ის, რაც ფინეთის საგარეო საქმეთა მინისტრმა გააკეთა, ამის საპასუხოდ მარტო შეხვედრას კი არ გაუუქმებდა სხვა ქვეყანაში პრემიერ-მინისტრი და მარტო ნოტა კი არ გაიგზავნებოდა, მარტივად, „პერსონა ნონ გრატად“ გამოაცხადებდნენ ასეთ პოლიტიკოსს, - განაცხადა გადაცემაში „დღის ქრონიკა“ პარლამენტის გარემოს დაცვისა და ბუნებრივი რესურსების კომიტეტის თავმჯდომარემ, მაია ბითაძემ, რომელიც ელინა ვალტენონის ქმედებას გამოეხმაურა.

მისივე თქმით, თუნდაც, ფინეთში რომ ვინმეს ასეთი რამ ეკადრა, ფინეთის კანონმდებლობის დარღვევისთვის სხვა ქვეყნის წარმომადგენელს აუცილებლად „პერსონა ნონ გრატად“ გამოაცხადებდნენ.

ბითაძემ აღნიშნა, რომ ფინეთი სულ ახლახან გაწევრიანდა ნატოში, უკრაინის ომის შემდეგ და „ძალიან პარადოქსულია, რომ ფინეთი გვიქნევს ხელს და გვასწავლის საერთაშორისო სამართალს“.

„ფინეთი ძალიან მარტივად გაწევრიანდა ნატოში და მიუხედავად იმისა, რომ ნატოს ქვეყნებზე მეტი აქვს გაღებული ნატოს მისიებში და აკმაყოფილებს ნატოს სტანდარტს, საქართველომ ვერა და ვერ მოიპოვა ეს სტატუსი, რომ აღარაფერი ვთქვათ უკრაინაზე - უკვე ღიად საუბრობენ, იმაზე, რომ საქართველოსა და უკრაინის ადგილი ნატოში არ არის.

ასე, რომ ფინეთის საგარეო საქმეთა მინისტრისთვის ადვილია, ერთი, რომ გამოიყენოს ეუთოს მანდატი და დაარღვიოს, მათ შორის ეუთოს წესდება - რაც მან გააკეთა ეს ეუთოს წესდების დარღვევაა. გარდა იმისა, რომ ჩვენი კანონმდებლობა დაარღვია და 5-ათასლარიანი ჯარიმა გამოეწერა და მეორე, მას ნატოს ქოლგა აქვს გადაფარებული და ძალიან ადვილია, რომ პატარა საქართველოს ხელი დაუქნიოს, მაშინ როდესაც არც ევროკავშირში მიგვიღეს და არც ნატოს ქოლგა გადაგვაფარეს თავის დროზე.

საბოლოო ჯამში, ყველაფერი ისე მიმდინარეობს, რომ საქართველოს ხელისუფლება საქართველოს მოსახლეობის მანდატზე დაყრდნობითა და მხარდაჭერით მთელს მსოფლიოს აჩვენებს, რომ ჩვენ გვაქვს ჩვენი ინტერესები, ჩვენ გვაქვს ჩვენი ისტორია, რომელიც სავსეა ძალიან ბევრი პოლიტიკური ტურბულენტობით. ჩვენ ძალიან კარგად ვიაზრებთ ჩვენს მდებარეობას. ძალიან კარგად ვიაზრებთ, როგორ სენსიტიურ მდგომარეობაში ვიმყოფებით ოკუპაციის პირობებში და როგორი სიფრთხილით უნდა მოვეკიდოთ საერთაშორისო ურთიერთობებს.

ასე, რომ რაც არ უნდა ვინმემ მასკარადი გამართოს, რომელი ქვეყნის წარმომადგენელი არ უნდა იყოს, მათ კარგად უნდა გაიგონ, რომ საქართველოს მოსახლეობა უკვე გაიზარდა და კარგად აღიქვამს, რომ არც ერთი უცხოელი აქ ჩვენი ინტერესების დამცველი არ იქნება. ჩვენი ინტერესების დამცველი და ჩვენი შვილების მომავლის ინტერესების დამცველი შეიძლება მხოლოდ საქართველოს მოსახლეობა იყოს“, - განაცხადა ბითაძემ.