ნიკა გვარამია: რაც ვნახეთ, ამის აღწერა შეიძლება - "არწივი ვნახე დაჭრილი ყვავ-ყორნებს ეომებოდა"

საქართველოს მესამე პრეზიდენტ მიხეილ სააკაშვილთან შესახვედრად, გლდანის ციხის სამკურნალო დაწესებულებაში მისი უფლებადამცველი ნიკა გვარამია მივიდა, რომელმაც პენიტენციური სამსახურის მიერ ცოტა ხნის წინ გავრცელებულ კადრებზე კომენტარი გააკეთა.

"ეს კადრები არ არის უწყვეტი კადრები და მთავარი ძალადობის ნაწილი მიხეილ სააკაშვილის წინააღმდეგ არის ამოჭრილი.

მიუხედავად ყველაფრისა, რაც ჩვენ ვნახეთ, ამის აღწერა შეიძლება ყველასთვის ცნობილი ფრაზით - "არწივი ვნახე დაჭრილი ყვავ-ყორნებს ეომებოდა", ზუსტად ეგრე იყო და ეს პარადიგმა მარტო ჩემ თავში კი არ გაცოცხლდა, ვაჟას უკვდავი სიტყვები, ყველა ქართველში გაცოცხლდა, მათ შორის თქვენს მომხრეებშიც, ქართულ ოცნებას მივმართავ.

ეს პარადგიმა ძალიან მძლავრია და ქართველები ბავშვობიდან ვსწავლობთ ამ პარადიგმას და ყოველთვის არწივის მხარეს ვართ. არწივი არის მიხეილ სააკაშვილი", - განაცხადა ნიკა გვარამიამ.

სპეციალური პენიტენციურმა სამსახურმა ქვეყნის მესამე პრეზიდენტის, მიხეილ სააკაშვილის გლდანის სამკურნალო დაწესებულებაში გადაყვანის მორიგი ვიდეო გაასაჯაროვა.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, 42 დღეა შიმშილობს.

ამავე თემაზე:

🔲  "ვინ ჩემი ფეხები ხართ, რომ დაგემორჩილოთ? პუტინის მონებო!" - მიხეილ სააკაშვილის მორიგი ვიდეო ვრცელდება

🔲 პენიტენციური სამსახური მიხეილ სააკაშვილის გლდანის სამკურნალო დაწესებულებაში გადაყვანის ვიდეოს ავრცელებს (ვიდეო)

🔲  ადვოკატის ინფორმაციით, სტრასბურგის სასამართლოს მოწოდების მიუხედავად მიხეილ სააკაშვილმა შიმშილობა არ შეწყვიტა