ნინო წილოსანი ევროკომისიიდან „მომავლის აკადემიაში“ თანხის ჩარიცხვაზე: ალბათ ეჭვი არავის ეპარებოდა, რომ მიმდინარე აქციები და რადიკალიზმი გარედან ფინანსდებოდა და იმ კანონების მიუხედავად, რომელიც ჩვენ მივიღეთ, იპოვეს გარკვეული გამოსავალი

ალბათ ეჭვი არავის ეპარებოდა, რომ მიმდინარე აქციები და რადიკალიზმი გარედან ფინანსდებოდა და იმ კანონების მიუხედავად, რომელიც ჩვენ მივიღეთ, იპოვეს გარკვეული გამოსავალი, - განაცხადა საქართველოს პარლამენტის ვიცე-სპიკერმა ნინო წილოსანმა „ქრონიკასთან“.

დეპუტატი გამოეხმაურა იმ ინფორმაციას, რომ ევროკომისიიდან „მომავლის აკადემიაში“ თანხა ფარულად ჩაირიცხა.

„ალბათ ეჭვი არავის ეპარებოდა, რომ მიმდინარე აქციები და რადიკალიზმი გარედან ფინანსდებოდა და იმ კანონების მიუხედავად, რომელიც ჩვენ მივიღეთ, იპოვეს გარკვეული გამოსავალი, თუ როგორ შემოიტანონ უცხოური დაფინანსება და როგორ კვებონ ექსტრემიზმი.

ჩვენი მხრიდან გაკეთებული გამონაკლისი საგანმანათლებლო სისტემასთან დაკავშირებით აღმოჩნდა უცხოური დაფინანსების შემოსატანად საუკეთესო საშუალება. ამ შემთხვევაში „ფრანკლინის კლუბის“ შვილობილ ორგანიზაციაზეა საუბარი, სადაც ასევე მიედინებოდა უცხოური დაფინანსება გასული თვეების მანძილზე. ეს არის ორგანიზაციები, რომლებიც კანონის გვერდის ავლით იღებდნენ საკმაოდ მსუყე დაფინანსებას და ამის შესაბამისად აორგანიზებდნენ და იხდიდნენ რადიკალიზმში თანხებს, რომელსაც ყოველდღე ვუყურებთ ქუჩაში“, - აღნიშნა წილოსანმა.

გაშიფრული სქემით, ევროკომისიიდან თანხა ფარულად „ენჯეოების“ და ადვოკატების გარდა ირიცხება „ფრანკლინის კლუბის“ მემკვიდრე „მომავლის აკადემიაში“. აკადემიის დამფუძნებელია ალექსანდრე ზიბზიბაძე, რეალური მფლობელი კი ტომ პალმერია. აკადემია ამზადებს ახალგაზრდებს, მათ შორის არასრულწლოვანებს და მიმდინარე პროტესტში ერთ-ერთ მთავარ როლს თამაშობს.

სქემით, „მომავლის აკადემიას“ ევროკომისიის თანხა „წამების მსხვერპლთა ფსიქო-სოციალური და სამედიცინო რეაბილიტაციის საქართველოს ცენტრმა“ სექტემბერში ჩარიცხა.