პარლამენტმა „საჯარო და კერძო თანამშრომლობის შესახებ“ კანონში ცვლილებას პირველი მოსმენით მხარი დაუჭირა

პარლამენტმა პირველი მოსმენით, დაჩქარებული წესით განიხილა და 91 ხმით მხარი დაუჭირა „საჯარო და კერძო თანამშრომლობის შესახებ“ კანონში ცვლილებას.

მომხსენებლის, პარლამენტის წევრის ირაკლი მეზურნიშვილის განცხადებით, კანონპროექტით ხორციელდება „საჯარო და კერძო თანამშრომლობის სააგენტოს“ ინსტიტუციური ცვლილება, მისი ფუნქციური მანდატის გაფართოება და სახელწოდების ცვლილება.

„სააგენტო, საჯარო და კერძო თანამშრომლობის პროექტებთან დაკავშირებული ფუნქციების გარდა, განახორციელებს ქვეყნის საინვესტიციო და ექსპორტის პოტენციალის განვითარებას. ასევე, სააგენტო საქართველოს პრემიერ-მინისტრის დაქვემდებარებიდან გადადის ეკონომიკისა და მდგრადი განვითარების სამინისტროს დაქვემდებარებაში“, - აღნიშნა ირაკლი მეზურნიშვილმა.

მისივე თქმით, კანონპროექტით გათვალისწინებული იყო, რომ „საჯარო და კერძო თანამშრომლობის სააგენტოს“ ახალი სახელწოდება ყოფილიყო „ინვესტიციების და ექსპორტის სააგენტო“, თუმცა წამყვანი კომიტეტის სხდომაზე განხილვის შემდეგ გამოითქვა მოსაზრება სააგენტოს სახელწოდება განისაზღვროს როგორც „ინვესტიციების სააგენტო“.

„მიზანშეწონილია, რომ სააგენტოს სახელწოდება ჩამოყალიბდეს როგორც „ინვესტიციების სააგენტო“. ცვლილება უკავშირდება სააგენტოს „აწარმოე საქართველოში“ მიმდინარე რეორგანიზაციას, რომლის საფუძველზეც საინვესტიციო და საექსპორტო პოტენციალის განვითარებასთან დაკავშირებული ფუნქციები აღნიშნულ სააგენტოს გადაეცემა. შესაბამისად, „ინვესტიციების სააგენტოს“ ასევე გადაეცემა საქართველოს 2026 წლის სახელმწიფო ბიუჯეტით გამოყოფილი ის ასიგნებები, რომლებიც ინვესტიციებისა და ექსპორტის მხარდაჭერისათვის არის გათვალისწინებული“, - განაცხადა ირაკლი მეზურნიშვილმა.