პენიტენციური სამსახურის ცნობით, მიხეილ სააკაშვილი სასამართლო პროცესს არ დაესწრება - რა განმარტებებს აკეთებს უწყება

ამ წუთებში თბილისის საქალაქო სასამართლოში, საქართველოს ექსპრეზიდენტის მიხეილ სააკაშვილის სასამართლო პროცესი მიმდინარეობს.

ადვოკატების განცხადებით მიხეილ სააკაშვილი მიუხედავად ჯანმრთელობის მძიმე მდგომარეობისა, მაინც აპირებდა პროცესზე დასწრებას, თუმცა მას პენიტენციურმა სამსახურმა ამის ნება არ დართო.

"მიხეილ სააკაშვილის მდგომარეობა გართულებულია, მას უკვე დაეწყო ტკივილები შინაგანი ორგანოების ტკივილები. სასამართლო პროცესზე პენიტენციურ სამსახურს არ გადაჰყავს, მიუხედავად დიდი ტკივილისა და სისუსტისა, ის მოიკრებდა ძალას და გამოცხადდებოდა პროცესზე", - განაცხადა ადვოკატმა ბექა ბასილაიამ.

სასამართლო პროცესის მიმდინარეობის პარალელურად, განცხადება გაავრცელა სპეციალურმა პენიტენციურმა სამსახურმა და ის მიზეზები განმარტეს, თუ რატომ არ ესწრება პროცესს თავად ბრალდებული მიხეილ სააკაშვილი.

უწყების ინფორმაციით, იგეგმებოდა მ. სააკაშვილის პენიტენციურ დაწესებულებაში ეტაპირებისათვის ხელის შეშლის მიზნით, დაწესებულებასთან მისასვლელი საავტომობილო გზების ბლოკირება, რიგი პოლიტიკური პარტიების წარმომადგენელთა საკუთრებაში არსებული ავტომანქანების საშუალებით.

სპეციალური პენიტენციური სამსახურის ინფორმაციითვე, ასევე განზრახული ჰქონდათ აღნიშნული დესტრუქციული ხასიათის მოქმედებების განხორციელება, რომელშიც მონაწილეობას მიიღებდა დაახლოებით 500-600 ავტომანქანა, რაც გამოიწვევდა უკონტროლო სიტუაციას, ქაოსსა და შექმნილი ვითარება ხელს შეუშლიდა მიხეილ სააკაშვილის ეტაპირების პროცესს.

როგორც უწყება აღნიშნავს, აღნიშნული სახის ქმედებებს შესაძლოა ადგილი ჰქონდა მისი სასამართლო დარბაზში ესკორტირების შემთხვევაშიც.

"ბრალდებულ/მსჯავრდებულ მ. სააკაშვილს შეწყვეტილი აქვს მკურნალობის არსებითი ნაწილი, სასამართლო პროცესზე გაყვანა და დასწრება წარმოადგენს დამატებით რისკს მისი ჯანმრთელობისთვის.

ყოველივე ზემოაღნიშნულის გათვალისწინებით, სპეციალური პენიტენციური სამსახური მოკლებულია შესაძლებლობას მოახდინოს ბრალდებულ/მსჯავრდებულ მ. სააკაშვილის თბილისის საქალაქო სასამართლოში წარმოდგენა" , - აღნიშნავენ უწყებაში.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან, მე-40 დღეა შიმშილობს.

სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.

ასევე დაგაინტერესებთ:

🔲 თბილისში სხვადასხვა აქციაზე პოლიციამ, ადმინისტრაციული წესით 46 პირი დააკავა

🔲 "სახელმწიფო დაწესებულების შენობის ბლოკირება კანონით აკრძალულია" - ვაჟა სირაძე სუსთან მიმდინარე აქციაზე დაკავებების შესახებ

🔲 "ღამე შენობებთან თენება ამ ეტაპზე არაეფექტური მგონია. უნდა ვიმოქმედოთ დილიდან, მთელი დღის განმავლობაში დემორალიზებული და ძალოვნების იმედად დარჩენილი რეჟიმის გამოსაშიგნად" - ნიკა მელია