პირადი ექიმი: მიხეილ სააკაშვილი მზად არის, ხვალ წარდგეს სასამართლოს წინაშე და დაელაპარაკოს ქართველ ხალხს

მიხეილ სააკაშვილის პირადი ექიმის ნიკოლოზ ყიფშიძის განცხადებით, ექსპრეზიდენტი თავს სუსტად გრძნობდა, თუმცა მზადაა, ხვალინდელ სასამართლო პროცესს დაესწროს.

"დღეს იყო სუსტად, მაგრამ მითხრა, რომ მზად არის, ხვალ წარდგეს სასამართლოს წინაშე და დაელაპარაკოს ქართველ ხალხს", – განაცხადა ნიკოლოზ ყიფშიძემ, რომელმაც მე-18 დაწესებულებაში მიხეილ სააკაშვილი მოინახულა.

კითხვაზე, ჯანმრთელობის მდგომარეობა აძლევს მას საშუალებას, რამდენიმესაათიან პროცესს დაესწროს, – ნიკოლოზ ყიფშიძე აღნიშნავს, რომ ამისთვის მზადაა.

"სუსტადაა, მაგრამ მე თქვენ გეტყვით, რომ მაგისთვის მზადაა", – განაცხადა ყიფშიძემ.

ამასთან, ნიკოლოზ ყიფშიძის თქმით, დაწესებულებაში მას განუცხადეს, რომ კორონავირუსის შემთხვევა არ დაფიქსირებულა.

"დაწესებულებაში რომ შევედი, ჩემი პირველი კითხვა ეს იყო და მითხრეს, რომ არანაირი კოვიდი აქ არ ყოფილა. ვიკითხე, მართლა არის დირექტორი კოვიდით ავად? მითხრეს – არა", – დასძინა ნიკოლოზ ყიფშიძემ.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. იგი სამი ინსტანციის სასამართლოს განაჩენით ცნობილია დამნაშავედ ვალერი გელაშვილის ცემის და სანდრო გირგვლიანის სისხლის სამართლის საქმეებზე და სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება. სააკაშვილი დაკავების დღიდან შიმშილობს. იგი ამჟამად იმყოფება სასჯელაღსრულების სისტემის მე-18 სამკურნალო დაწესებულებაში. 11 ნოემბერს მიხეილ სააკაშვილმა განაცხადა, რომ მაღალტექნოლოგიურ კლინიკაში, გარდა გორის სამხედრო ჰოსპიტლისა, გადაყვანის შემთხვევაში, მზად არის შიმშილობა შეწყვიტოს.

ამავე თემაზე:

🔲 "დღეს თქვენ შეგიძლიათ წერტილი დაუსვათ არაადამიანურ ქმედებებს და ამით დაეხმაროთ არა ერთ ადამიანს, არამედ საქართველოს ასიათასობით მოქალაქეს" - ლიზა ბათიაშვილი პრეზიდენტს ღია წერილით მიმართავს