პრეზიდენტი: ვზეიმობთ დამოუკიდებლობის 30 წელს და უკან თუ გავიხედებით, ისტორიის არცერთ ფურცელზე არ ვართ შეთანხმებული

საქართველოს პრეზიდენტის, სალომე ზურაბიშვილის განცხადებით, ქვეყანა დამოუკიდებლობის 30 წელს ზეიმობს, რეალურად კი უკან თუ გავიხედებით, არაფერზე შემდგარა შეთანხმება, ისტორიის არცერთ ფურცელზე.

"მე ვთვლი, რომ წარმოვადგენ საზოგადოების განცდას, ჩემშიც არის ეს, რომ ეს დაპირისიპრება, რომელიც გროვდება ჩვენს ქვეყანაში, უნდა რაღაცნაირად გადავიდეს საქმიან ურთიერთობაში.

ეს არ იქნება რაღაც ჯადოსნური ერთიანობა, რომელიც ერთ დღეში შეიქმნება, ეს არ არის პოლიტიკური პარტიების შერიგება, ეს არ არის ჩემი პროცესი და ჩემი ინიციატივა, ესაა ჩემი დაწყებული პროცესი, ჩემი ინიცირებული პროცესი მაგრამ ეს იქნება საზოგადოებრივი პროცესი, რომელშიც ყველა უნდა იყოს ჩართული და რომლის ფორმა იქნება თვით საზოგადოების მიერ შექმნილი და თემებიც წარმოიშობა საზოგადოებიდან.

ეს პროცესი იწყება იმით, რომ ჩვენ წარსულზე და წარსულის რეალურად არცერთ ფურცელზე არ ვართ შეთანხმებული, არ გვაქვს სახელმწიფო, თუ ეროვნული ისტორია არ გაგვაჩნია, თუნდაც ბოლო 30 წლის.

ჩვენ ვზეიმობთ დამოუკიდებლობის 30 წელს და რეალურად, უკან თუ გავიხედებით, არაფერზე არ ვართ შეთანხმებული, არცერთ ფურცელზე ამ ისტორიის და ეს ნიშნავს იმას, რომ ყოველივე ოჯახში არსებობს იმ ოჯახის ისტორია, იმ ოჯახის ახსნა-განმარტება ამ ფურცლების.

ეს იმასაც ნიშნავს, რომ ჩვენ ვერ შევთანხმდებით დღევანდელ დღეზე და მომავალზე.

ჩვენი დაპირისპირება გროვდება, ასე ვთქვათ, სხვადასხვა შრეებად ამ სხვადასხვა პერიოდების მანძილზე და ჩაბეტონებულია.

ჩვენ თუ ეს არ დავძლიეთ, შეიძლება უფრო კიდევ გაღრმავდეს ეს დაპირისპირება და ჩვენ ვერ ვაშენოთ ის ქვეყანა, რომელიც ჩვენ გვინდა ყველას, ამაში მე ვარ დარწმუნებული, დემოკრატიული, ევროპული, ძლიერი სახელმწიფო", - განაცხადა სალომე ზურაბიშვილმა.

სხვა სიახლეები:

🔳 BLB: მოსამართლემ „ნეტფლიქსის“ შუამდგომლობა, საქმის წარმოების შეწყვეტის შესახებ, არ დააკმაყოფილა

🔳 COVID-ის შემდეგი ვარიანტი უფრო გადამდები იქნება, ვიდრე ეს "ომიკრონია"

🔳 საბერძნეთს შესაძლო კორონავირუსის ახალმა ტალღამ გადაუაროს - პროფესორის განცხადებით პანდემია ადვილად არ დასრულდება!

🔳 ზუგდიდის მერსა და მის პირველ მოადგილეს კორონავირუსი დაუდასტურდათ