ქართული ენციკლოპედიური ლექსიკონი თურქულ ენაზე დაიბეჭდა

2021 წლის 14 დეკემბერს, ქ. ანკარაში საქართველოს საელჩოს აქტიური ჩართულობითა და თურქეთის ქ. იზმირში საქართველოს საპატიო კონსულის, ბ-ნი ნურეთთინ ჩარმიქლის მხარდაჭერით, თურქულ ენაზე, დაიბეჭდა ,,ქართული ენციკლოპედიური ლექსიკონის“ (Gürcü Ansiklopedik Sözlüğü) სასიგნალო ეგზემპლარი.  

წიგნის ავტორია თურქეთის ქართული დიასპორის ერთ-ერთი თვალსაჩინო წარმომადგენელი, მთარგმნელი და მკვლევარი ერდოღან შენოლი (ერეკლე დავითაძე).  საგულისხმოა, რომ გამოცემა მიეძღვნა ანკარაში საქართველოს პირველი დიპლომატიური წარმომადგენლობის გახსნის 100 წლისთავს და მისი მიზანია, აამაღლოს საქართველოს შესახებ ცნობადობა თურქეთში.  

600-გვერდიანი ,,ქართული ენციკლოპედიური ლექსიკონი“ მოიცავს ზოგად ინფორმაციას საქართველოს, ქართული კულტურის, ისტორიის, არქიტექტურის, ხელოვნების, ტურისტული ღირსშესანიშნაობებისა და სხვ. მნიშვნელოვანი თემების შესახებ.  გამოცემა, მალე, სრული ტირაჟის გამოცემისთანავე იქნება ხელმისაწვდომი მკითხველებისთვის.

ამასთან, ახლო მომავალში, ქ. ანკარაში საქართველოს საელჩოს ორგანიზებით, გაიმართება ,,ქართული ენციკლოპედიური ლექსიკონის“ წარდგენა, წიგნის ფართო საზოგადოებისთვის გაცნობის მიზნით.  აღსანიშნავია, რომ გამოცემის ავტორმა, ერდოღან შენოლმა, ქართული სამეცნიერო სტატიების გარდა, თურქულ ენაზე თარგმნა ქართველი პოეტისა და პროზაიკოსის, ფრიდონ ხალვაშის ავტობიოგრაფიული წიგნი ,,ომრი“. აგრეთვე, მისი უშუალო ჩართულობით, 10-მდე სრული და მოკლემეტრაჟიანი ქართული დოკუმენტური ფილმი ითარგმნა თურქულ ენაზე.  

აგრეთვე დაგაინტერესებთ:

📌 აღმოსავლეთ პარტნიორობის სამიტის დეკლარაცია - ევროკავშირი აღიარებს ასოცირებული ტრიოს, საქართველოს, მოლდოვასა და უკრაინის ინიციატივებს, გააძლიერონ თანამშრომლობა ევროკავშირთან

📌 დიდი ბრიტანეთში "ომიკრონით" გარდაცვალების პირველი შემთხვევა დადასტურდა

📌 ჯანმო: "ომიკრონი" შედარებით ნაკლებად მძიმე სიმპტომებს იწვევს, თუმცა ის ვაქცინების ეფექტიანობას ამცირებს