რუსეთის რამდენმა მოქალაქემ გადმოკვეთა ლარსის გამშვები პუნქტი? - შსს განახლებულ ინფორმაციას ავრცელებს

"სასაზღვრო-გამტარ პუნქტ „დარიალში“ მგზავრთა ნაკადი მნიშვნელოვნად შემცირდა", - რუსეთის მხრიდან საქართველოში შემომსვლელი მოქალაქეების შესახებ, საქართველოს შინაგან საქმეთა სამინისტრო განახლებულ მონაცემებს აქვეყნებს.

უწყების ცნობით, ასევე შემცირდა საქართველოს ყველა სასაზღვრო გამშვებ პუნქტში რუსეთის ფედერაციის მოქალაქეთა მიერ საზღვრის კვეთის რაოდენობა.

"საქართველოს შინაგან საქმეთა სამინისტრო რუსეთის ფედერაციის მხრიდან საქართველოში შემომსვლელი მოქალაქეების შესახებ მონაცემებს, მაღალი საჯარო ინტერესიდან გამომდინარე, პროაქტიულად აქვეყნებს.

კერძოდ, 29 სექტემბრის 10:00 სთ-დან 30 სექტემბრის 10:00 სთ-მდე საქართველოს საზღვარი ყველა სასაზღვრო-გამშვები პუნქტის გავლით გადმოკვეთა რუსეთის ფედერაციის 6 109 მოქალაქემ, ხოლო საქართველოს ტერიტორია დატოვა 5 186 მოქალაქემ.

28 სექტემბრის 10:00 სთ-დან 29 სექტემბრის 10:00 სთ-მდე შემოვიდა 9 642 და გავიდა 5 448 მოქალაქე.

ამასთანავე, სასაზღვრო გამშვებ პუნქტ „დარიალში“ სატვირთო და მსუბუქი ავტომობილების გატარება ჩვეულ რეჟიმს დაუბრუნდა, რის შედეგადაც ბოლო დღეებში შეფერხებული სატრანზიტო ავტო მიმოსვლა სრულად აღდგა.

შინაგან საქმეთა სამინისტრო მომავალშიც აქტიურად განაგრძობს მგზავრთა ნაკადის სტატისტიკის გამოქვეყნებას და საზოგადოების ინფორმირებას“, – აღნიშნულია შსს-ს მიერ გავრცელებულ ინფორმაციაში.

ასევე დაგაინტერესებთ:

* კელი დეგნანი: საქართველოს მთავრობის გადასაწყვეტია, რა იქნება საუკეთესო გზა უსაფრთხოების საკითხების დაბალანსების და იმ პირების მხარდასაჭერად, რომლებიც გაურბიან ომსა და რეპრესიებს

* "მე მაქვს პატარა, მაგრამ ლამაზი სახლი" - როგორ სახლში ცხოვრობს გიორგი კალანდია (ფოტოკოლაჟი)