შალვა პაპუაშვილის 4 ოქტომბრის საქმეზე ბრალდებულების განაჩენზე: აპირებს თუ არა ევროკავშირის ელჩი, ევროკავშირის სახელით ბოდიში მოუხადოს საქართველოს პრეზიდენტს მათ მიერ გამხნევებული და წაქეზებული ადამიანების გამო

მნიშვნელოვანია, რომ სასამართლოს მიერ დადგინდა ამ პირების ბრალეულობა დამხობის ორგანიზების საკითხში და კიდევ ერთხელ მიეცა უკვე სამართლებრივი შეფასება იმას, რაც მოხდა 4 ოქტომბერს. აქამდე თუ იყო პოლიტიკური შეფასებები ჩვენი მხრიდან, დღევანდელი დღიდან ჩვენ უკვე გვაქვს მყარი სამართლებრივი სასამართლოს დოკუმენტი იმასთან დაკავშირებით თუ რასთან გვქონდა საქმე 4 ოქტომბერს, - განაცხადა საქართველოს პარლამენტის თავმჯდომარე შალვა პაპუაშვილმა 4 ოქტომბრის საქმესთან დაკავშირებით სასამართლოს მიერ გამოტანილ განაჩენზე.

მისი თქმით, ხელისუფლების დამხობის მცდელობის საქმეზე პოლიტიკური პასუხისმგებლობა ბრიუსელს ეკისრება და ევროკავშირის სახელით ბოდიში ევროკავშირის ელჩმა უნდა მოიხადოს.

„ეს არის სრულად ბრიუსელის პოლიტიკური პასუხისმგებლობა, რაც ჩვენ ვიხილეთ 4 ოქტომბერს. როგორც 4 ოქტომბრის მომზადების პროცესში, როცა ჩვენ ვიხილეთ ევროკომისიის მხარდაჭერა წინასწარ დაანონსებული ძალადობის მიმართ, ისე 4 ოქტომბრის დღეს, იმ მომენტში, როდესაც მიდიოდა შტურმი პრეზიდენტის სასახლეზე, როდესაც პირდაპირ ეთერში სხვადასხვა სოციალური ქსელების მეშვეობით ევროპარლამენტარები მხარს უჭერდნენ ხელისუფლების დამხობას. მათ შორის გახლდათ მოლდოვის პრეზიდენტი მარია სანდუ, რომელმაც ძალადობას პირდაპირ გამოუცხადა მხარდაჭერა მაშინ, როდესაც ის მიმდინარეობდა.

ჩვენ გვაინტერესებს პასუხი ევროკავშირისგან, სად არის ის ღირებულებითად. რა არის ის ევროპული ღირებულება, რაზეც ასე გვესაუბრებიან ხოლმე. ძალადობა არის ევროპული ღირებულება?

ხელისუფლების დამხობა ყოფილა თურმე ევროპული ღირებულება. ევროკავშირის ელჩისგან, რა თქმა უნდა მოველით დავითხოვთ პასუხს 4 ოქტომბერთან დაკავშირებით. აპირებს თუ არა ევროკავშირის ელჩი, ევროკავშირის სახელით ბოდიში მოუხადოს საქართველოს პრეზიდენტს მათ მიერ გამხნევებული და წაქეზებული ადამიანების გამო და აპირებს თუ არა პაველ ჰერჩინსკი ბოდიში მოუხადოს საქართველოს პრეზიდენტს იმის გამო, რომ 4 ოქტომბრიდან 7 თვე გავიდა და ერთხელაც კი არ დაგმო ის ძალადობა პრეზიდენტის სასახლეზე“, - განაცხადა შალვა პაპუაშვილმა.