"უკრაინის მოქალაქის, მიხეილ სააკაშვილის უფლებები სრულად უნდა იყოს გარანტირებული" - ზელენსკისა და ღარიბაშვილს შორის სატელეფონო საუბარი შედგა

უკრაინის პრეზიდენტი ვლადიმირ ზელენსკისა და საქართველოს პრემიერ-მინისტრ ირაკლი ღარიბაშვილს შორის სატელეფონო საუბარი შედგა, სადაც მიხეილ სააკაშვილის საკითხი განიხილეს.

ამის შესახებ უკრაინის პრეზიდენტი სოციალურ ქსელ "ტვიტერში" წერს.

"საქართველოს პრემიერ-მინისტრ ღარიბაშვილთან სატელეფონო საუბარში ხაზი გავუსვი, რომ უკრაინის მოქალაქის, მიხეილ სააკაშვილის უფლებები სრულად უნდა იყოს გარანტირებული საერთაშორისო ნორმების შესაბამისად. მივმართე მიხეილ სააკაშვილის დედის, ნათესავებისა და უკრაინელი ექიმების მასთან დაშვების თხოვნით“– წერს ზელენსკი ტვიტერში.

ვლადიმირ ზელენსკისა და ირაკლი ღარიბაშვილის სატელეფონო საუბრის შესახებ ინფორმაცია საქართველოს მთავრობის ვებგვერდზეც გავრცელდა.

ინფორმაციის თანახმად, ირაკლი ღარიბაშვილმა ზელენსკის განუცხადა, რომ პატიმარი სააკაშვილი პენიტენციურ დაწესებულებაში შესახლების პირველივე დღიდან, ისევე როგორც სხვა პატიმრები, იმყოფება მონიტორინგის ქვეშ და მას 24-საათიან რეჟიმში შესაბამისი სამედიცინო მომსახურება ეწევა.

საქართველოს ექსპრეზიდენტი მიხეილ სააკაშვილი 1 ოქტომბერს დააკავეს და იგი დაკავების დღიდან შიმშილობს. ის ამჟამად სასჯელაღსრულების მე-18 სამკურნალო დაწესებულებაში იმყოფება. 11 ნოემბერს მიხეილ სააკაშვილმა განაცხადა, რომ მზად არის შიმშილობა შეწყვიტოს, ერთი პირობით - თუ მას მაღალტექნოლოგიურ კლინიკაში გადაიყვანენ, გარდა გორის სამხედრო ჰოსპიტლისა.

ამავე თემაზე:

🔲 "ეს ვიდეოები ბევრ კითხვის ნიშანს სვამს და არის სამწუხარო" - ევროკავშირის ელჩი სააკაშვილის ვიდეოჩანაწერებზე