ზურაბ ქადაგიძე: თავისუფალი მედია დემოკრატიის საფუძველია, მაგრამ ჩრდილოვანი მმართველობა, ფსევდოღირებულებები და თავისუფალ მედიას ამოფარებული საინფორმაციო ტერორიზმი ლიბერალური ფაშიზმის კლასიკური გამოვლინებაა

„როდესაც რადიკალიზმმა აზრი დაკარგა, რევოლუცია ჩავარდა, ექსტრემიზმმა თავი ამოწურა, აგენტოკრატების პატრონები მიხვდნენ, რომ კომპრომეტირებული პოლიტიკოსები ქართულ პოლიტიკაში ამინდს ვეღარასდროს შექმნიან. აბსოლუტურად განულებულია მათი რეიტინგი და მათმა პატრონებმა გადაწყვიტეს, რომ ავანსცენიდან რიგრიგობით ჩამოხსნილი აგენტოკრატები ახალი, კარგად ორგანიზებული მედიასინდიკატით ჩაანაცვლონ“, - განაცხადა პოლიტიკური ჯგუფის „ხალხის ძალის“ წევრმა ზურაბ ქადაგიძემ პარლამენტის პლენარულ სხდომაზე.

მისი თქმით, ამ დღეებში საზოგადოებამ იხილა უცხო ქვეყნის პირდაპირი პოლიტიკური ინტერვენცია მედიასინდიკატის მეშვეობით, რაც არის ყველაზე ძვირად ღირებული საინფორმაციო სპეცოპერაცია საქართველოში.

„ბრიტანულმა და ევროპულმა ფონდებმა 22 მედიასაშუალება დააფინანსეს 17.5 მილიონი ლარით.
საქართველოში არასოდეს დაფინანსებულა მსგავსი მასშტაბის საინფორმაციო ქსელი, რომლის მთავარი მიზანი არის მუდმივი კრიზისის, დაძაბულობისა და რეალობის დამახინჯების შექმნა.

ეს არის გრძელვადიანი ზეწოლის ტექნოლოგია, სადაც მედიას იყენებენ არა როგორც თავისუფალ ინსტიტუტს, არამედ როგორც პოლიტიკურ იარაღს. იმიტომ, რომ ხელოვნურად შექმნილი პროტესტი, მისი მუდმივი შენარჩუნება და სახელმწიფოს დელეგიტიმაციის მცდელობა მათთვის ერთადერთი ინსტრუმენტია გავლენის შესანარჩუნებლად.
როდესაც ერთი მცირე ჯგუფი იღებს კოლოსალურ ფინანსურ რესურსს და ამ რესურსს მიმართავს არა ჟურნალისტიკაში, არამედ საზოგადოებრივი აზრის ფორმირებაში, ეს უკვე აღარ არის მედია. ეს ჩრდილოვანი მართვის სინდიკატია“, - განაცხადა პარლამენტის წევრმა.

მისივე თქმით, საქართველო დღეს უძლებს ისეთ წნეხს, რომელსაც თავის დროზე ევროპის ბევრმა ქვეყანამ ვერ გაუძლო.

„ჩვენ არ ვზღუდავთ თავისუფალ მედიას – თავისუფალი მედია არის დემოკრატიის საფუძველი, მაგრამ ჩრდილოვანი მმართველობა, ფსევდოღირებულებები და თავისუფალ მედიას ამოფარებული საინფორმაციო ტერორიზმი, ლიბერალური ფაშიზმის კლასიკური გამოვლინებაა.

ამ ბოროტების წინააღმდეგ ბრძოლა ქართული საზოგადოების და სუვერენიტეტის დაცვა თითოეული ჩვენგანის ვალდებულებაა. ახალი პოლიტიკური გზამკვლევი უნდა შევქმნათ ზოგიერთი უცხო ქვეყნის საელჩოს, ფონდისა, თუ საერთაშორისო აქტორისთვის განმარტებითი ბარათის თვალსაზრისით, რომ საქართველოზე პოლიტიკური გადაწყვეტილებები მიიღება საქართველოს მოქალაქეების მიერ არჩეულ პარლამენტში და არა მოსკოვში, თუ სხვადასხვა ჩრდილოვან დერეფნებში“, - განაცხადა ზურაბ ქადაგიძემ.