"აბიტურიენტების ჯგუფში ვკითხულობ სრულიად კატასტროფა და გამაოგნებელ პოსტებს - მშობლებო, აბიტურიენტი არ არის კონკრეტული ოპერაციების შესასრულებლად მომართული რობოტი"

სოციალურ ქსელში ერთ-ერთი მომხმარებელი წერს:

"აბიტურიენტების ჯგუფში ვკითხულობ სრულიად კატასტროფა და გამაოგნებელ პოსტებს...

რომ ბავშვებმა დაბალი ქულები აიღეს და მშობლებისთვის უდიდესი იმედგაცრუება არიან,

რომ ნორმალური ქულები მიიღეს და მაინც იმედგაცრუებული დატოვეს მშობლები...

რომ "რესურსი", რომელიც  მშობლებმა მათში ჩადეს წყალში ჩაიყარა...

და ბევრი მსგავსი შინაარსის სასოწარკვეთილი პოსტი.

ყველა მშობელი, რომელიც ფიქრობთ რომ თქვენს შვილში ჩადებული "ინვესტიცია"  უკან უნდა ამოიღოთ და თუ მაქსიმალური შედეგი არ აქვს ბავშვს, ესე იგი ყველაფერი წყალში ჩაგეყარათ, ხართ ტოქსიკური და სრულიად გაუმართლებელი დამოკიდებულების მქონე.

აბიტურიენტი არ არის კონკრეტული ოპერაციების შესასრულებლად მომართული რობოტი. 

საგამოცდო პერიოდი არის ძალიან დიდი სტრესი მათთვის და ყველა ერთნაირად ვერ ხვდება ამ სტრესს, ზოგის ფსიქიკა ძალიან მყარია, ზოგის ნაკლებად.

და ასეთ კრიტიკულ პერიოდში, იმის ნაცვლად, რომ ბავშვები საყვედურებით აავსოთ და თავი არარაობად აგრძნობინოთ, სჯობს გვერდით დაუდგეთ და უთხრათ რომ ყველაფერი წინ არის და არ აქვს მნიშვნელობა ხუთი, ათი და თხუტმეტი ქულით მეტს მიიღებენ თუ ნაკლებს, უთხარით რომ შემდეგ ცდაზე გამოუვათ, რომ ყველაფერს შეძლებენ და თქვენ იქნებით მათ გვერდით ყოველთვის.

ხო და კიდევ, არ აქვთ ამ ბავშვებს თქვენი ვალი, არა!

პირიქით, ეს თქვენ გაქვთ მოვალეობა მათ წინაშე, რომ გარკვეულ ასაკამდე კარგი მშობლობა გაუწიოთ!

მერე თვითონ იპოვიან თავიანთ გზას.

პ. ს. მე რომ აბიტურიენტი ვიყავი, ჩემების პოზიცია იყო ასეთი "ყველაფერი გამოვა, მაგრამ თუ არ გამოვა, რაღაც იქნება, გამოსავალს ვიპოვით." 

ყველაფერი რომ გამოვიდა ორმაგად უფრო სასიხარულო იყო მერე, ჩემი თავისგან ისედაც ბევრს მოვითხოვდი, მაგრამ ისიც ვიცოდი რომ რამე ისე ვერ ყოფილიყო ამის გამო მშობლების არ უნდა შემრცხვენოდა", - წერს პოსტის ავტორი.