რუბიოს თქმით, ტრამპს სი ძინპინისთვის ირანთან დაკავშირებით დახმარება არ უთხოვია

აშშ-ის სახელმწიფო მდივანმა მარკო რუბიომ განაცხადა, რომ პრეზიდენტმა დონალდ ტრამპმა პეკინში ჩინეთის ლიდერ სი ძინპინთან მოლაპარაკებების დროს მას ირანთან ომში დახმარება არ სთხოვა. ამის შესახებ რუბიომ NBC News-თან ინტერვიუში განაცხადა.

რუბიოს თქმით, ტრამპმა და სი ძინპინმა ირანში ომი და ჰორმუზის სრუტის ბლოკადა განიხილეს.

„ჩინურმა მხარემ განაცხადა, რომ ისინი არ ემხრობიან ჰორმუზის სრუტის მილიტარიზაციას და არც გადასახადის სისტემის დაწესებას და ეს ჩვენი პოზიციაა“, - განაცხადა აშშ-ის უმაღლესმა დიპლომატმა ტრამპს, სი ძინპინსა და ქვეყნების დელეგაციებს შორის ორ საათზე მეტი ხნის განმავლობაში გამართული მოლაპარაკებების შემდეგ.

მედიის ცნობით, მოსალოდნელი იყო, რომ ტრამპი ჩინეთის ლიდერს ირანთან აშშ-ისრაელის ომის დასრულებასა და ჰორმუზის სრუტის გარშემო არსებული ჩიხის მოგვარებაში დახმარებას სთხოვდა. თუმცა, რუბიომ აღნიშნა, რომ ტრამპმა „მას არაფერი სთხოვა“.

„ჩვენ ჩინეთს დახმარებას არ ვთხოვთ. ჩვენ მათი დახმარება არ გვჭირდება“, - განაცხადა რუბიომ.

ამასთან, აშშ-ის სახელმწიფო მდივანმა აღნიშნა, რომ ტრამპმა და სი ძინპინმა ირანთან დაკავშირებით საერთო ენა იპოვეს, ჩინეთმა კი კიდევ ერთხელ დაადასტურა, რომ არ ეთანხმება ირანის მიერ ბირთვული იარაღის შემუშავებას.