ეკა ჩემია კატარში საქართველოს კონსულს დავით აბსანძეს გაწეული დახმარებისთვის მადლობას უხდის - „12 საათიანი ლოდინის, უკიდეგანო რიგების და ქაოსის პარალელურად მხსნელად ჩვენი ქვეყნის კონსული მოგვევლინა...“

ფსიქოლოგი ეკა ჩემია კატარში საქართველოს კონსულს დავით აბსანძეს გაწეული დახმარებისთვის მადლობას უხდის და სოციალურ ქსელში განცხადებას ავრცელებს.

„ჩემო ძვირფასო მეგობრებო უკვე საქართველოში ვარ და კიდევ ერთხელ ხმამაღლა ვაჟღერებ გაცვეთილ მაგრამ უკვდავ ფრაზას - ჩემს სამშობლოს არაფერი ჯობია! ჰოდა, ამ ჟანრში კიდევ ერთი საოცარი ამბავი უნდა მოგიყვეთ ცნობილი მოვლენების გამო დოჰას აეროპორტში ჩარჩენილებს რომ გადაგვხდა.

12 საათიანი ლოდინის, უკიდეგანო რიგების და ქაოსის პარალელურად. სიტუაციაში მხსნელად ჩვენი ქვეყნის კონსული David ABsandze მოგვევლინა. წარმოიდგინეთ დოჰას უკიდეგანო აეროპორტის ადამიანებით სავსე სივრცე, სადაც სხვადასხვა ქვეყნის მოქალაქეები, ბავშვები და ხანდაზმულები, ფორსმაჟორულ სიტუაციას და ბედს შეგუებულები სკამებზე და ქვის იატაკებზე ათენებენ ღამე, ამ დროს 45 ქართველი(გოადან მომავალი სხვა ჯგუფიც შემოვიერთეთ) ამაყად წელგამართული მიყვება საკუთარი ქვეყნის კონსულს,რომელიც ახერხებს ყველა ჩვენგანი საუკეთესო სასტუმროთი, ტრასფერით და ყველა აუცილებელი პირობით უზრუნველყოს დააბინაოს და აგრძნობინოს, რომ სადღაც, უცხო ქვეყანაში, რთულ ვითარებაში, შეიძლება გქონდეს საკუთარი ქვეყნის, მისი ინსტიტუციების და იქ მომუშავე ადამიანების პიროვნული ღირსებების და სამსახურებრივი სტატუსის მნიშვნელოვნების რეალური იმედი.

მადლობა ამ შეგრძნებისთვის რომელიც, ალბათ მთელი ცხოვრება მემახსოვრება ისევე როგორც ჩვენი საოცარი იაპონური არდადეგები, რომლისთვისაც პერსონალური მადლობა, მის ავტორს და სულის ჩამდგელს Melita Lomadze -ს, რომელიც ჩვენი ქვეყნის პოპულარიზაციისთვის საოცარ საქმეებს აკეთებს საქართველოდან იაპონიამდე მადლობა და დიდი სიყვარული ჩვენი გუნდის თითოეულ წევრს,რომლებიც ამ მოგზაურობამ ერთმანეთს დაგვაკავშირა“, - წერს ეკა ჩემი სოციალურ ქსელში.

ინფორმაციისთვის, 23 ივნისს განვითარებული მოვლენების გამო კატარის საჰაერო სივრცე დაიხურა და ყველა ფრენა გადაიდო. საქართველოს საელჩოს წარმომადგენლებმა აეროპორტში მყოფი საქართველოს 43 მოქალაქე სასტუმროთი და კვებით უზრუნველყვეს.

საქართველოს მოქალაქეები დოჰადან მეორე დღეს გამოფრინდნენ.